Ang iyang nadungog

Daghan kanato nga tungod sa stressful kaayo nga kinabuhi buot mobiya sa naandang kutay sa kinabuhi. Buot natong mohimo og atong kaugalingong kalibutan. Kining maong kalibutan buot natong himoon ingon nga atong natad diin kita dunay kontrol ug dunay mahimo alang sa atong kaugalingong kagustohan. Sa ato pa, alang nato special kaayo kita labina kun ang atong mga sentido molagbas kun unsay anaa sa kasagaran. Gitawag kini og auditory hauntings diin ang hingtungdan nakadungog nga dunay nagsugo kaniya og bisan unsa nga iyang pagahimoon.

Ang hingtungdan nagtuo nga kini usa ka private revelation gikan sa Dios. Mao nga dunay mga hingtungdan nga nagtuo nga sila espesyal ug lahi sa kadaghanan. Alang niya espesyal siya. Ug kay espesyal man siya natural lamang nga mamahimo siyang hatagan og igong pagtagad. Ang maong kapasikaran maoymahimong hinungdan nga makuha niya ang atensiyon gikan sa kadaghanan. Apan sa ngadto ngadto mahimong ang comfort zone ning maong kahimtang ang mamamahimo usab nga dakong urom sa hingtungdan labina kun kini dili gikan sa Dios ug gikan nuon sa dautan. Dili makatulog ug mamahimong makalolooy na hinuon.

Careful kaayo ang simbahan kun maghisgot kita og mga private revelations. dili tanan tuohan, ug dili tanan isipon nga milagro. Kini aron di mahimong uran uran ang gitawag nilang milagro. kinahanglang moagi gyud sa hustong proseso ug aron magiyahan ang mga tawo kun unsay husto ug unsay makiangayon. Sa laing bahin kinahanglan nga mamahimong careful usab ang si bisan kinsang hingtungdan sa pagpaminaw niining maong taho kay basin mao kini hinungdan sa mga additional stressors nga makahatag og dugang problema sa gitawag natong biktima labina kun kini paundayonan hangtud sa katapusan.

Ang mahinungdanon kinahanglan kini pakgangon ug hatagan og igong pagtagad alang sa kaayohan sa biktima mismo nga nangangkon ug nituo sa iyang kasinatian ingon nga tinuod apan usa lamang diay ka ilusyon busa angayan lamang nga kini pakgangon. Pakgangon kini sa paagi usab nga dili detrimental kun humiliating sa hingtungdan aron mamahimong mobalik sa naandang bul-og ang kinabuhi sa tawo nga nahimong isolated gikan sa kadaghanan.

* * *

Diha sa kahinay

Buot unta kong mohinay apan sa dihang nagpahinay natakobyan hinuon ko og balatian mao nga ang pagsulti pwerteng lisura.

Sa laing bahin kini nagpahinumdom kanako nga diha sa kasakitan mahimong magamit nato kini sa kasantosan.

Diin atong gihalad ang atong pag-antos alang sa uban nga nagkinahanglan niini.

Diha sa kahinay nahimong mas makita nimo ang imong palibut ingon nga kabahin sa imong kinabuhi, ang kabahin nga magdala nato ngadto sa kalambigitan.

Kalambigitan nga dili mahimong mabayran.