EDITORYAL - Paghawan sa aseras

Nagkaanam na og balik ang katahom sa kadalanan ilabi na sa dalan Colon sa Dakbayan sa Sugbo nunot sa hugot nga pag-regulate sa mga sidewalk vendors nga kaniadto maoy naghawod-hawod diha sa agianan sa mga pedestrians. Ang maong mga vendors tinuod nakadugang sa kaalegre sa lugar ug nakatabang sab sa mga kabus aron sila mabuhi. Ang uban kanila kapin na sa 20 ka tuig naninda ug karon ra sila nakasuway nga giabog og ingon niini.

Apan inay nga ipanghimaraot sa mga naapektahang vendors, angay una nilang balikan ang ilang sitwasyon ug kun unsa ang hitsura  sa kadalanan sa siyudad sa dihang wala pa sila i-regulate.

Nagpasad ang mga basura, nagbara ang mga kanal tungod sa basurang plastic, nakamugna og traffic kay ang mga pedestrians ilabi na panahon sa tingpauli sa mga trabahante,  anha naman moagi sa mismong agianan sa mga sakyanan.

Kining tungod kay di naman maagian ang aseras tungod kay wala og tuo ang mga lamesa ug lamesita sa mga vendors. Gani kay puno naman ang aseras, ang mga de kariton nga mga vendors anha napud sila sa mismong dalan naninda maong ang mga pedestrians maglikay-likay kanila ug anha hapit sa tunga sa dalan moagi.

Angay makasabot ang mga apektado nga magunsa naman lang sila sa pagpaninda kun ang dapit nga ilang gitindahan wala nay tawong ganahang moagi? Dili ba ang tigpalitan kanila mao man ang mga pedestrians?

Gawas sa pedestrians, naa pay laing problemang kinahanglang atubangon, kaning mga libud-suroy nga anha na magpuyo sa aseras. Sama sa dalan V. Gullas, may dalan Colon, Sanciangko, mga skywalks sa siyudad , Mango Avenue ug daghan pang uban.

Dili tungod kay hugaw silang tan-awon, kondili tungod kay gibutang nila ang kaugalingon sa peligro ug hasta na sa mga motorista ug mga pedestrians.

Ang mga libudsuroy naglakip sab sa mga bata. Sila kinahanglang luwason gikan sa karsada kay sila maoy daling mabiktima sa mga ilegalista.