Padayon gyud mayor

Nag-ambahan paingon sa Cebu City Hall kaniadtong Martes ang kapin 100 ka sidewalk vendors nga wala na patindaha sa mga aseras dinhi sa dakbayan.

Kining pag-clear sa atong mga karsada ug aseras, gimando gayud kini ni Presidente Duterte ug gipatuman sa Department of Interior and Local Government (DILG).

Si Mayor Edgardo Labella mipatuman gyud sa kamandoan sa presidente ug mao nga ang PROBE Team sa City Hall midili na sa gatusan ka sidewalk vendors nga maninda sa aseras ning siyudad.

Ang mga opisyal sa siyudad nangita baya gyud og dapit nga kabalhinan pagpaninda sa mga apektadong vendors, ug usa sa mga dapit nga gitagana kanila, mao ang P. Gullas, gikan sa Osmeña Boulevard lahos na sa Borromeo Street.

Duna pay laing mga karsada nga dapit sa Carbon diin adto sila balhinon, apan ang mga tindera gusto man gyud nga mobalik sa dapit nga sila gipapahawa.

Husto baya pud si Raquel Arce, ang hepe sa PROBE Team, nga mangita ra man gyud ang katawhan kon asa na ang mga suki, sama sa mga tigbaid og mga nipper, nail cutters, gunting ug uban pa.

Sa laktud, maanad ra gyud unya ang mga tawo kon asa nila pangitaa ang mga tigbaligya sa produkto nga ilang gikinahanglan. Kon hugot lang gyud ang baruganan ni Mayor Labella, nindot ug hapsay na ang dakbayan.

Kaniadto, grabeha na gyud kasamok sa atong mga aseras, ilabi na nga misiaw na ang mga Muslim vendors kay nagsalig nga dili sila tinud-on sa kanhi mayor nga gibunyagan nga “Sultan” sa mga Muslim sa Sugbo.

Pasayloa ko nga migamit sa pulong “Muslim” kay gituyo ko kini aron masabtan gyud sa katawhan. Kon dili gud kontrolahon sa kagamhanan ang pagpahapsay sa atong aseras, moabot ang higayon nga angkonon na nila nga sila maoy tag-iya niini.

Aw, tan-awa, dili ba nangangkon na ang uban sa mga sidewalk vendors nga may katungod sila nga maninda diha sa aseras. Himoon nako nga ehemplo ang dapit diha sa “138 Mall” sa Colon.

Pagka samoka gyud kay gipasagdan ra sa City Hall ang maong abuso na sa mga naninda, pero karon hapsay na kaayo.

Kon mahawan ni Mayor Labella ang atong aseras, hurot ang akong pagdayeg kaniya.

Pero usbon nako, nahimo ni kay aktibo man kaayo ang tawo nga gitahasan sa mayor aron i-clear ang atong mga aseras.

Sugyot nako nga ipatawag ni Labella ang mga kapitan ug iya kining mandoan nga motabang pag-clear sa ilang mga karsada.

Daghang mga opisyal, ilabi na diha sa Barangay Carreta, nagmika lang ug gipasagdan nga ang Alviola Street dili na kaagian og sakyanan kay hakog man sila sa gahum ug mahadlok mapilde sa sunod eleksyon.