Of course mahanugon gyud ta sa gipamutol nga kahoy (mga 5 ka punoan) diha sa dalan M. Velez kilid sa Capitol. Mga kahoy nga diha tunga sa dalan gyud nagbarog.
Hinumdoman nga samtang nagpadayon ang pag-semento sa maong dalan, dihay mga plano pagputol sa maong mga kahoy. Hangtud nga nahuman na lang ang concreting, nagpabiling nagbuntaog ang maong mga kahoy.
Kini gumikan sa masipa nga pagsupak sa mga tree lovers ug sa mga environmentalist. Matud nila, karaan na kaayo ang maong mga kahoy, ambut pila na ka tuig. Gawas nga nakahatag og landong sa mga pedestrian, nakatabang kini pagsumpo sa baha. Very good.
Usa usab ako ka-tree lover (kinsa guy dili). Apan, nakapugong na kini sa kaugmaran, ug kun nakahatag kini’g kahasol ug ka-peligro sa mga motorista ug sa pedestrians mismo, one has to give way.
Unsa man, wa na lang tay kaugmaran, pabor sa mga kahoy nga anaa gyud maghari-hari tunga sa dalan?
Ma-imagine nato nga kon wala pamutla ang mga kahoy sa ubang dapit sa nasud, wala untay Makati city karon, walay Quezon City, ug ubang mga dagkung siyudad sa nasud nga sa unang mga kakahoyan ug kalasangan.
Taga-Guadalupe ko, ug matag adlaw mag-extra careful gyud ko inig-agi nako sa M. Velez gumikan sa mga kahoy nga mora’g nag-atang nako, nagkatawa pa.
Busa, alang kanamong taga-Guadalupe, ug sa ubang libohan nga mag-agian diha, perhaps mga tree lovers usab, nalipay niining maong kaugmaran.
The decades-old, but hazardous trees have to go. Mag-tree planting lang unya ta somewhere. Kanang dili tunga sa dalan.
Kahinumdom ko, nga nag-massive tree planting mi panahon ni Marcos. Gilakip gani niadto ang private sector ... ang pribadong mga buhatan ug kompaniya. Dihay panahon nga dili ka ma-kasal kon dili ka maka-tree plant. Apan gumikan sa atong kasuko ni Marcos, pagpuli ni Cory, wa padayona ang tree planting. Karon, sige ta’g reklamo sa lunop ug baha.
Ang DENR mi-issue sa permit pagpamutol sa kahoy, on condition nga ang DPWH mohatag og 950 ka seedlings ngadto sa DPWH alang sa national greening program sa gobyerno.
Dinhi nahinumdom nasad ko sa green revolution program ni Imelda. Wa sad ni padayona ni Cory. Karon mao pay atong pagpananom. Late na ni uy! Pila pa kaha ka tuig una mahimong kahoy kining mga seedling nga atong itisok karon, o ugma, o sa sunod tuig pa.
In the meantime sigehan na ta’g kuso-kuso sa nagkalainlaing katalagman nga mohapak kanato matag-karon ug unya.
* * *
Mahitungod sa pagpanghatag sa financial assistance ngadto sa mga senior citizen, sayo kaayo ko nimata (mga alas 5:30) aron di ko ma-problema sa parking. Apan wa ko maka-park dayon kay puno na, naghuwat na lang ko nga dunay mogawas. Sa ato pa, mas sayo silang nimata kay kanako, mga alas 4:00 pa tingali.
Ug kadtong walay sakyanan, nagpunsisok na gawas sa gym pagkuha sa ilang numero. Nagdasok sa sulod. Apan pagsugod na sa distribution, hapsay ug dali na kaayo. 100 ka disbursing officer ang gi-assign sa Guadalupe, mao nga in my case, nakakobra ko alas 7:15 pa sa buntag. Ang uban nga sayo nga nagsugod, nakakobra alas 7:00 pa.