Kini ang iyang giingon kanako uban ang pahiyom dayon tunol sa sobre sa akong mga kamot.
Kay nahinumdom man ako sa panultihon nga “To refuse an offer is an insult,” mao nga akong gidawat ang maong diyotay apan kinasingkasing nga pahalipay.
Mapasalamaton kaayo sila human sa maong panagtagbo ug niuli usab ako sa kumbento nga kapoy apan kontento tungod kay may nahimo man kitang maayo niadtong adlawa sa naandang routine sa kinabuhi sa parokya.
Dili kini mahitungod sa gihatag kondili sa disposisyon nga gipakita sa naghatag.
Ang pagkamanggihatagon sa mga yanong tawo walay bahid sa pagpaaron.
Kun sila gani ang mohatag ila kining gipakapinan og gugma bisan pa man sa mga higayon malisud alang kanila ang pagpakabuhi.
Mao nga ang maong pagkamanggihatagon nagdapit usab nako nga mamahimong manggihatagon sa akong kaugalingong paagi.
Ang mahinungdanon ang tanan nalipay mamahimong makakita sa Diosnong presensiya sa atong taliwala.
Ang dili pagbalibad sa maong hatag pagpadayag man sa atong pagdason sa ilang tinguha nga makatampo bisan sa ginagmay nga paagi.
Dili himoong babag ang ilang kakabus aron sila dunay mahimo ug dili nato himoong hinungdan ang giingon nilang kaadunahan aron dili ta magkinahanglan.
Sa akong bahin, mas maayo ning maong kahimtang kaysa magpunay lamang ka og duol sa inilang mga kwartahan o sapian nga mao namay magbuot o mohikot sa imong liog aron ikaw ilang pagbut-an.
Mao nga kun ugaling sila manuktok kanimo ug motanyag og hinabang hunahunaa daan kun pinasikad ba kini sa tinud-anay nga tinguha kay basin baya nga ang maong pagtuktok tabang usa diay ka dakong laang.