Voyeurism

Murag wala pa masayri sa mga bag-ong tubo ang Republic Act 9995 nga gitawag og Anti-Photo and Video Voyeurism Act of 2009.

Kini tungod sa napagya sa social media ug migawas sa mga balita sa radyo, television ug pamantalaan ang gibuhat sa mga Senior High School nga tinun-an ngadto sa usa nila ka kaubang babaye nga wala nay kalibotan tungod sa kahubog.

Giingon sa balita ug giasoy sa mga nakakita niini sa social media nga gihuboan sa mga kauban niining lalaki sulod sa sakyanan ang babaye nga tinun-an nga wala nay kalibotan sa kahubog og gihinol-hinol ang pribadong parte sa lawas niini nga nibantang human gikuha ang  salimbong niini.

Samtang gihinol-hinol sa lalaking tinun-an ang pribadong parte sa lawas sa tinun-an nga babaye, lain usab ang nagkuha og video sa iyang gihimo. Human sa ilang gihimo nakita na kini sa social media.

Gipaimbistigaran na ni Heneral Debold Sinas, direktor sa rehiyonal nga buhatan sa kapolisan dinhi sa Central Visayas, ang hitabo ug nailhan na sa abogado sa usa ka unibersidad diin nagtungha ang usa sa mga lalaki sa video ug mihimo na pod sila og kinaugalingon nga imbistigasyon.

Ang voyeurism usa ka sexual interest nga gihimo pinaagi sa pagpaniid niadtong mga tawo nga nalambigit sa intimate nga behavior sama sa paghubo, pakighilawas ug ubang gihimo niini nga makonsiderar mga pribado.

Gidili sa Voyeurism Act ang pagkuha og hulagway o video sa tawo o grupo nga nakighilawas o susamang lihok o sa pagkuha og hulagway sa imahin sa pribadong parte sa lawas sa tawo sama sa hubo nga undergarment clad genitals, pubic area, sampot o totoy sa babaye nga walay pagtugot sa hingtungdan linalang ubos sa sitwasyon nga pribado nila kining gihimo.

Gidili usab ang pagkopya ug pagpakopya sa hulagway o video sa naghilawas o sa susamang lihok may bayad man kini o wala.

Ug dili na mahinungdanon kun ang pagkuha sa hulagway o video may pagtugot ba o wala.

Makahatag unta kini og gamay nga kahayag niadtong mga gustong  mosunod o molapas niining maong balaud.