Angay nga mobalhin

Nagmagahi gayud si Lapu-Lapu City lone district Representative Paz Radaza pagbiya sa City Hall bisan pa man sa sunod-sunod nga awhag ni Mayor Junard “Ahong” Chan sa pagbalhin sa kongresista sa iyang opisina.

Hagbay ra nga nag-opisina sa City Hall ang representante sa Kongreso. Gani adunay city ordinance nga nagtugot sa  kongresista pag-opisina sa CityHall. Apan niining iyang paglingkod isip bag-ong mayor, gusto ni Chan nga gamiton ang maong opisina sulod sa City Hall.

Apan puwerte nga kisikisi ni Radaza, ang kanhi mayor ug bag-ong napili nga kongresista puli sa iyang anak. Dili gayud kuno siya mohawa gikan sa City Hall tungod kay legal kuno ang iyang pag-opisina niini.

Gumikan niini, makapaabot kita nga mograbe ang kagubot mugna sa maong isyu diha sa Lap-Lapu City Hall. Kini tungod kay, sa akong nakita, dili gayud mohunong si Chan hangtud nga mobalhin og opisina si Radaza.

Hinuon adunay punto usab si Chan. Isip mayor, aduna siyay katungod sa City Hall. Tungod kay mao kini ang seat of power sa dakbayan, dili nato mabasol si Chan kun iyang gamiton ang maong opisina ni Radaza alang sa pagpakusog sa serbisyo sa City Hall ngadto sa katawhan.

Gawas pa niini, suportado si Chan sa iyang lakang mismo ni Department of Interior and Local Government Secretary Eduardo Año, kinsa nag-awhag usab ni Radaza sa pagbalhin og opisina gawas sa City Hall.

Kun padayon kining maong gubot, hangak alang kang Radaza pagsustiner sa ilang tug of war uban kang Chan. Kini tungod kay daghan ang nagtuo nga dehado gayud si Radaza bisan kun adto pa sila sa korte mag-abot.

Mao nang mas maayo pa nga mobalhin na lamang si Radaza pag-opisina. Kay kun morag tuko gayud siya nga mokapyot sa City Hall, basin baya kun makompromiso na unya ang iyang serbisyo ngadto sa katawhan.

Usa pa, tungod kay gikandadohan na ang iyang opisina sa city government, angay lamang nga mohawa na si Radaza ug mobalhin pag-opsina.