Kalayo ug uban pa

Agosto 18, 2019: Ikakawhaan

nga Domingo sulod sa tuig

Mga Pagbasa:   Jer. 38;4-6,8-10/

Sal. 40/Heb. 12;1-4/Lk. 12;49-53

Nahimong kabahin sa kinabuhi natong mga tawo ang kalayo. Gamiton nato kini sa pagluto sa atong makaon, pagdaob ug gani pagsunog sa mga basura.

Sa karaang panahon ang atong mga katigulangan dako kaayo og pagtahod sa kalayo, giisip nila kining dios. Sa laing bahin, ang kalayo diha sa natad sa Dream Psychology mahimong mosimbolo sa pagbati nga nahuptan.

Ang kainit niini gikinahanglanon aron mamahimong maayo ang matag relasyon.

Sa ebanghelyo karong Dominggoha nahigmata kita nga sa dakong panginahanglan nga pasilaobon ang kainit sa padayong pagsunod sa gilatid nga balaod sa ebanghelyo bisan pa man kun kini nagpasabot og dakong pagsupak gikan sa habig mga tawo. Kay dili tanang majority maisip natong husto ug dili tanang minority pagaisipon nga sayop.

Anaa gyud nang panagsungi labina kun maghisgot kita og baruganan. Ang maogn baruganan mamahimong pabor nato o batok ba kanato nga gani mismo anaa ang panagbingkil sulod sa pamilya.

Ang mahinungdanon mao nga sa atong pagpuyo ning kinabuhia mas palabihon unta nato ang pagsunod sa kabubut-on sa Dios kaysa atong kabubut-on lamang.

Tinuod, anaa ang mga mosupak apan mas maayo na lang tingali ang makabaton og daghan kaaway kaysa magpuyo sa kinabuhi nga uyon uyon lamang sa mga hitabo sa palibot. Kun ugaling ilang awayon gumikan sa imong baruganan angay kang magmaya kay sa maong kapasikaran nakapatandog ikaw sa ilang kasamdan.