Ed manggihunahunaon, angay ampingan

Ang aseras gibuhat lamang para agianan sa mga tawo. May mga desenteng tindahan na kini nga nanaglaray ug bukas ang mga pultahan alang sa nagkadaiyang mosulod kustomer, kinsa may gustong paliton, o mag-window shopping.

Adunay restawran, botika, barberohan, masahian o uban pa nga pulos nagbayad og dinagkong buhis sa gobiyerno. Sa laktod, naghupot silag mga importanteng dokumento nga nagmatuod nga ang ilang pagnegosyo ning maong permanenteng dapit, legal. Sa tinuoray lang, kining daghang naninda sa sidewalk o aseras, ikatandi sa bagang duot sa hulmigas nga naghatag og dakong purihisyo sa mga tawong mangagi ug sa mga dagkong tindahan mismo.

Lainlain lang ang matang sa mga anino nga nangnegosyo diha. May mangangayog relo, mamaligyag prutas, panyo, pansing alahas, maglutog baligyang pagkaon ug daghan pa! Pun-an, nga anaay magdulag dama o chess, pastilan ang aseras, puwerte na intawong huota. Bisag unsaog likay ni Inday nga dili masangit sa iyang gikasugat, usahay maumod-lupyak gyod ang ugdo niynag dughan sa bukton sa lalaking nakurat. Pagkasuwerteng Lolo!

Mao kini ang nakitang kahasol ni Pres. Rodrigo R. Duterte sa mga aseras halos sa tanang siyudad sa Pilipinas. Hinungdan, nga mimando siya nga palimpyohan kining maong dapit nga hagbay rang nalibon sa mga nanuyhakawng balili ug ibalik ang hawan nang aseras ngadto sa katawhan.

Agig pagtuman, gipalimpiyohan dayon ni Cebu City Mayor Edgar Labella sa iyang PROBE team ang mga aseras pinaagi sa pagpanglarot sa nanuybong sidewalk vendors, diin ang dalan Colon daw nakahanggap og preskong hangin human maangkon ang temporariyong kahawan.

Temporaryo, tungod kay si Mayor Ed, may kasingkasing nga puno sa kamanggihunahunaon. Nasayod siya nga daghan gyong pamilyang kabos ang makulbag kaldero kon hingpit niyang putlon ang maong matang sa panginabuhi. Iyang giklaro nga makabalik ra sila kon makasumiter-tuman sa tanang gikinahanglang rekisitos nga gipanday sa komitiba, kinsa maoy iyang gitahasan niini. Tuod man, anaay pipila nga nakabalik na. Apan subo palandungon, nga aduna lang gihapoy nakalapas sa higpit nga pagpatuman sa regulasiyon. Busa, gisuspenso.

Kini nagpasabot lang, nga gahi gyog ulo ang tawo. Walay disiplina sa kaugalingon. Ug labaw sa tanan, walay tahod sa gipakitang kamanggiluy-on ni Mayor Ed. Kay imbes ampingan ang pagkamanggihunahunaon niini, giabuso hinuon.