Usa sa giatubang karon nga problema sa Bureau of Jail Management and Penology kining paghuot sa mga prisohan dinhi sa Pilipinas nga gidumala sa maong ahensya o sa mga probinsya.
Kaniadto pa nagsinardinas na ang mga prisohan apan nisamot kini sugod niadtong 2016 sa dihang gimando ni Pres. Duterte ang pagpangusog sa kampanya kontra illegal nga drugas diin kada adlaw gatosan ka drug suspects ang madakpan sa mga polis operations sa tibuok nasud.
Lisod na karon makakita og prisohan sa nasud nga wala magdasok. Kay gawas sa illegal nga drugas ug mga dagkong krimen, duna say mga nangapriso tungod sa mga ginagmay ug binugoy nga salaod.
Niadtong Agusto 8, 2019 gipirmahan ni Pres. Rodrigo Duterte ang
Republic Act (R.A.) 11362 o ang Community Service Act.
Ang mga badlungon sa katilingban paserbisyohan diha sa dapit diin sila nakasala agi og silot o bayad sa nabuhat nilang kadaot tungod sa pagpabadlong.
Ang mga salaod nga mahimong silotan ubos sa RA 11362 mao kadtong mga salaod nga may silot nga arresto menor o usa ngadto sa 30 ka adlaw nga pagkabilanggo ug kadtong usa ngadto sa unom ka buwan nga pagkapriso ang silot (arresto mayor). Usahay tungod sa kadako sa danyos sama sa pagpamuak, pagpangguba og mga butang sa uban o paghimo og eskandalo sa publikong dapit, ang mga hukom mosilot og arresto mayor sa mga dinakpan.
Tungod niini, mapriso gyud sila sa mga dagkong prisohan ug magdugangdugang lang sa kahuot didto.
Pinaagi sa RA 11362, dili na sila kinahanglang ipapriso apan silotan gihapon sila pinaagi sa pagpasilhig sa kadalanan, paglimpyo sa mga kanal, pagtabang sa kalihokan sa social services sa ilang lokalidad ug uban pa. Kay kun dili sila mosanong, hayan sa prisohan na nila bayran ang sala.
Maisip nga restorative justice ang RA 11362 ug makatabang pag-rehabilitate sa mga nakasala tungod kay basin og nabuhat nila kadto tungod lang sa kakuwang sa giya o wala nila tuyoa nga nakasala.