EDITORYAL - Barangay kontra Dengue

Dako gyud nga problema ang illegal nga drugas apan diay laing matang hulga sa kaugmaon sa kabataan ang hangtud karon gidebatihan pa gihapon diha sa gobiyerno kun unsay angay buhaton pagpakgang niini. Ang sakit nga dengue.

Ang Department of Health mideklarar nga naa na sa epidemic level ang tibuok nasud tungod sa gidaghanon sa mga nasakit ug namatay gikan Enero hangtud Hulyo ning tuiga. Kapin 116 mil ang natakboyan ug dul-an 500 na ang nakalas.

Hangtud karon walay panagang ang katawhan batok niini. Duna na untay dengvaxia vaccine, apan nasakyan man sa politika.

Apan diay epektibong panagang nga wala magkinahanglan og politiko, ang paglimpyo sa palibot sa panimalay matag adlaw.

Kay wala may pangbakuna batok sa dengue, ang DOH nibalik sa kaniadto naandan nilang kampanya batok sa lamok. Ang 4 O’Clock Habit o ang paglimpyo sa palibot matag alas-4 sa hapon.

Ang tumong niini nga gub-on mga itloganan sa mga lamok sama sa mga napundong tubig diha sa kaang, botelya, bisan panit sa candy, lata, mga ligid, mga sandayong sa mga atop ug uban pa.

Ang Aedes Aegypti, lamok nga nagdala sa kagaw sa dengue mabuhi ug mangitlog lang sa mga napundong limpyo nga tubig.

Angay hinumdoman nga ang lamok wala magkamanag o maglakaw aduna kini pako ug magbalhin-balhin lang sa mga balay.

 Importante gihapon ang paggamit og insect repellents, moskitero, pagpaaso, pagsuot og tag-as og bukton nga sapot, pagbutang og screen sa mga bintana ug pultahan ug uban pa.

Apan subo paminawon kay tingali duna lamang usa o duha ka pamilya sa usa ka sitio ang diniyos manglimpyo, ang uban wala.

Aning dapita unta mangusog ang mga barangay officials ug barangay health workers. Sila maoy angay nga naa sa frontline batok sa dengue ug  maoy aktwal nga mangunay sa pagpanglimpyo aron ang mga tawo maikog ug motabang dili kay magpunay og pundo sa barangay hall.