Gugma batok kahaw-ang

Lisod tugkaron ang giladmon sa tinuorayng gugma. Daghang minyo nga pag-abot sa pipila ka tuig sa ilang panagluon, dihang gisulayan pagkusokuso sa subaskos sa kinabuhi ang kalig-on sa puting pisi nga mihiusa kanila sa kaminyoon, humok ra gyong nabugto.

Higala nakong security officer misugilon nga nakatimaho siya nga iyang asawang nakigrelasyon sa usa ka kawani sa law office.

Nahibulong siya nganong tagdugay nang mouli iyang misis sa ilaha.

Hangtod miabot ang yugto nga nasakpan gyod niya sa akto ang makalilisang kalayo nga giduladulaan sa mga maluibon sulod sa mabugnawng lawak - ang gipaningot nga kainit sa pagpakasala.

Usa ka ex-seminarian ang maong security officer. Gihigugma niya pag-ayo iyang asawa.

Busa, iya rang gipasaylo dungan ang pag-uli sa iyang asawa ngadto sa mga ginikanan niini, kinsa maoy iyang gipananghiran niadtong adlaw nga pangasaw-on na niya ilang anak.

Sekreto kong gipangutana ang akong amigo kon unsa kadugay molungtad ang iyang paglipay sa asawa panahon sa mabugnawng kagabhion sa ilang panadulog?

Matod niya, layo rang 15 minutos, human na siya. Didto, ako siyang giprangkahan: “Mao diay, mao diay nga nangita siyag lain kay wa man nimo mahatag ang makatagbawng kalipay nga iyang gikinahanglan.”

No wonder! Nganong wala gyod sila magkaanak? Kay kon himasa pa lang siyag mga istorya sa Wildflower sigurado gayod nga dili sila magkabulag. Hinuon makaanak pag daghan.

Niining bag-o, usa ka 24 anyos nga asawa nasakpan sa iyang bana nga nakighilawas sa kabit, kinsa 48 na ang panuigon.

Gipadakop man tuod sa bana ang duha ka mabudhion, apan gibuhian ra usab sa kapolisan paglabay sa 12 ka oras human niya sila pasayloa, diin nagpinirmahay gyod og kasabotan ang masig ka habig.

Ang rason nganong gipasaylo? Tungod sa naghingaping gugma sa bana ngadto sa iyang asawa.

Apan giklaro sa misis nga bisag gipasaylo na sa bana, dili na siya makig-uli niini.

Kay matod pa sa asawa: “Siya ra gihapoy hinungdan nganong nabuhat nako ni.”

Hala, no? Makalibog! Tiaw bay, duruha ka bana ang parehong adunay dakong gugma sa ilang kapikas. Pero, gibulagan gihapon.

Dili kaha tungod kay ang matang sa gugma nga ilang gipabati ngadto sa ilang asawa napuno sa tumang kahaw-ang? May dakong kulang?