EDITORYAL - Kurapsyon sa PCSO

Daghan ang nakurat sa kalit-kalit nga pagpasirado sa mga lotto outlets sa Philippine Charity Sweepstakes Office (PCSO) lukop nasud.

Daghan sab ang mga kabalakang nitumaw ug pagduhaduha tungod kay dili ikalimod nga daghan sab nga natabangan ang PCSO sa mga pangpublikong tambalanan ug uban pang pundo sa nagkadaiyang mga local government units sa ilang mga lokal sab nga mga programa.

Wala pay kompletong ekplinasyon ang gobiyerno kun nganong gipasiradohan ang mga lotto outlets, apan sa mga paskin sa mga gipansiradohang patdanan, dunay nakabutang nga mando kini ni PRRD o Presidente Rodrigo Roa Duterte.

Matud pa nga may video si Duterte sa social media nga namasangil nga grabe ang kurapsyon diha sa PCSO. Ang pagpasirado sa mga lotto outlets natigayon pipila palang ka adlaw gikan sa paglingkod sa bag-ong general manager niini nga si kanhi Cebu City Police Office director retired Colonel Royima Garma.

Si Garma gikan sa Davao sa wala pa kini madestino dinhi sa Visayas ug sa CCPO. Sayo siyang niretiro human natudlo para sa PCSO.

Si Garma daan ng namahad nga kun siya makalingkod sa maong ahensya iyaha kining limpyuhan gikan sa mga kurakot. Siya kaha ang nakasakop?

Samtang tuod may mga naluwas sa kwartang gikan sa PCSO, wala kini magpasabot nga walay nahitabong kurapsyon diha sa maong ahensya.

Matag adlaw pila kaha ka milyones o bilyones ka pesos ang ilang makolekta gikan sa tanan nilang outlets apan pila lang kahay aktwal nga mosulod sa panudalanan sa gobiyerno gikan niini?

Giingong 55 porsiyento unta sa kita niini gitagana sa premyo, 30 porsiyento alang sa charities, social fund sa Office of the President. Ang 15 porsiyento kontribusyon sa gastos pag-operate ug kapital sa PCSO samtang ang sobra adto tanan mapunta sa charity funds.

Ang kurapsyon sa PCSO kun mao kini nakita karon sa pangulo ug rason sa pagpasira nangahulogan bang dunay mangapriso sa mosunod nga mga adlaw?

Kinahanglan gyud kining malimpyohan kay daghan kaayong mga kabus nga nagkinahanglan og hinabang. Kun malimpyohan kini mas daghan ang matabangan.