Magpakalimos sa dalan dapat dakpon

Kada Biyernes, adlaw nga tingsimba sa mga debotos ni Sr. Santo Niño, sagad sa mga adunahan anha moparking sa ilang sakyanan sulod sa nataran sa Cebu Metro Cathedral.

Manglakaw na lang sila paingon sa Basilica del Santo Niño Pilgrim Center sanglit haduol ra ang gilay-on niini gikan sa Cathedral.

Subay sa agianan padulong sa gawas, duol sa kombento sa cathedral, malabyan sa manimbahay ang naglarayng makililimos nga nanglingkod sa sementadong agianan, diin usa o duha ray baldado (wala nay mga bitiis) samtang ang uban, kompleto man tuod sa mga kamot ug tiil, pero mga tigulang na ug daw sa wala nay mga anak o apo nga kadangpan.

Mao nga nagpakiluoy na lang intawon sa mga tawong nangagi o milabay. 

Lahi kaayo ang kinaiya sa nagpakilimos sa kadalanan, kun itandi sa mga makililmos sa cathedral.

Ang sa Cathedral, puro pagpakiluoy ang pagpangayo, kontento na bisag unsa ka gamay ang madawat.

Samtang ang sa kadalanan, sagol binagsik ilang modus.

Mokalit lag duol sa sakyanan ug kusog manuktok. Ang drayber nga makalitan, makurat intawon.

Akong kauban sa trabaho, mipaubos dayon sa iyang bentana dihang may miduol-nanuktok nga batang bulingit paghunong niya tungod sa mi-Stop signal nang traffic light.

Gihatagan gilayon niyag tibuok 5-peso coin ang bata. Kadawaton pa dili. Kay gigamyan!

Pastilan, naunsa ba, nga sa paglarga sa akong kauban, ilabay bitaw sa bata ang P5-coin ngadto sa iyang sakyanan!

Maayo gani, kay lawas ang naigo sa kotse ug dili ang windshield.

Niining bag-o, didto sa usa ka busy nga dalan sa Manila, gisugat-alihan sa batan-ong lalaking nagpakilimos ang kotse.

Napugos intawon paghunong ang babayeng drayber.  Misenyas ang lalaki nga mangayog kuwarta samtang mipakita sa gikumkom niyang bato.

Sa kahadlok sa babaye, giablihan niya ang walang bintana ug mihatag og sensilyo.

Pero gigamyan ang maldito, miyamar nga P100 iyang gusto.

Aw, nanirado ang drayber ug mipadagan. 

Ilamba bitaw na sa batan-on ang gibitbit niyang bato ngadto sa windshield. Haskang, siyagita sa babaye.

Ingon niini na kabangis ang mga magpakilimos sa karsada. Dili lang sila abog nga makapuling.

Kun dili, mga tayaong lansang nga makatetanus sa mga kasingkasing nga gisamaran.

Dapat, dakpon ug hiposon na sila.