Padayon ko nga midayeg kang Mayor Edgardo Labella kay gipaguba niya ang mga barung-barong nga kunohay tindahan, apan gihimong panimalay nga gitukod diha sa M.L. Quezon Boulevard, likud sa Carbon Public Market sa Dakbayan sa Sugbo.
Bisan sila si kanhi mayor Michael Rama ug Tomas Osmeña, wala makapaguba sa maong mga barung-barong nga pwerteng samoka ug ang uban giingong gigamit pa isip suyopanan sa shabu.
Husto si Mayor Labella nga angay’ng ibalik ang karsada nga kaagian sa mga sakyanan.
Awhagon usab nako ang PROBE Team nga gipangulohan ni Raquel Arce nga unta kanunay’ng motan-aw sa maong dapit ug atimanon dayon kon may mobalik pagtukod og barungbarong diha sa karsada. Kun makaagi na ang mga sakyanan sa M.L. Quezon Boulevard, makapaluag kini sa M.C. Briones Street nga karon maoy gihugopan sa mga sakyanan.
Salamat kaayo kay gipakita ni Mayor Labella ang political will, kay matud niya nga bahala na og daghan ang masuko kaniya ug usa ra ka termino nga siya mahimong mayor, basta mapakita ra niya ang tinuoray nga serbisyo. Bravo mayor!
* * *
Grabe kaayo ang mga pagpamatay sa giingong mga tawo nga nalambigit sa pagpayuhot og gidiling matang sa drugas.
Mangayo lang ko og pasaylo nga ingnon ko kamo nga kun kining mga tawhana, nalambigit man gyud sa drugas, dili ko malooy kanila.
Sila ra usab maoy mabasol ngano nga sila gipangpatay.
Una, kining mga tawhana mibotar tingali kang Presidente Duterte kaniadto, kang kansang tinguha nga pamatyon ang mga nalambigit sa drugas. Nganong wala man sila moundang sa ilang binuang?
Ang ilang kaisog nga padayon gihapong namaligya og ilegal nga drugas, nagpasabot nga wala na sila mahadlok nga patyon sa mga tawo nga nasilag gyud sa mga nalambigit sa drugas. Kay wala man sila mahadlok, aw mao na ang angay kanila.
Tinuod, ilegal ang direktang pagpahamtang og silot sa mga nakahimo og salaod, apan gisuportahan nako ang lakang niining mga “vigilantes” kay naghatag lang sila og dangan sa ambisyon sa uban.
Sayonan ka nga ang usa ka ginikanan migasto gyud aron makalampos sa pagtuon ang ilang mga anak, ug makakuha og kurso, unya tungod sa pagkagumon sa drugas wala na makapadayon sa pagtungha?
Matag higayon nga makakita ko og mga tawo nga gibanhigan ug gipangpatay, unya makuhaan og daghang shabu, dili nako tuyoon nga makapahiyom ko nga naiban-ibanan ang mga durugista. Apan ang pangutana kon mahurot ba kaha sila?
Dinhing bahina, angay nga kitang katawhan motabang bisan sa paghatag og inpormasyon sa atong kapolisan.