Way hunong ang mga hinawayon ni Presidente Rodrigo Roa Duterte sa iyang paagi sa pagpadagan sa nasud ilabi na sa iyang palisiya sa pagpakigrelasyon sa ubang kanasuran sa kalibotan. Buwan na kapin ang nakalabay gihimong puhonan sa mga hinawayon sa gobyerno ni Duterte ang nahitabo sa mga mananagat nga gidasmagan sa mga giingon nga mga mananagat nga taga China.
Apil nga gihimong isyu sa mga hinawayon sa presidente mao ang pamahayag niini nga nagkasabot sila sa Presidente sa China nga tugotan nga makapanagat sulod sa Exclusive Economic Zone sa Pilipinas ang mga mananagat nga Tsino.
Laing isyu nga gikabay-an sa mga hinawayon ni Presidente Duterte nga miabot na gani sa United Nations Human Rights Commission mao ang mga patay nga nahimong resulta sa gubat batok sa gidili nga druga nga gilusad sa iyang administrasyon.
Ang mga hinawayon gusto nga tangtangon ang Presidente sa iyang katungdanan pinaagi sa impeachment tungod sa iyang gihimo nga ilang gikonsiderar nga usa ka pagtraydor sa nasud.
Apan way mipursige sa mga hinawayon sa pagpasaka og reklamong impeachment batok sa Presidente, siguro tungod kay nahadlok sila sa kasikat niini o ba kaha sa bahad niini ngadto kanila nga iya kining ipadakop.
Kun imong sabton ug imong palawman ang imong pagsabot sa gihimo nga lakang ni Presidente Rodrigo Roa Duterte sa mga isyu nga iyang giatubang klaro ug tataw nga molutaw nga kining tanan tungod sa interest sa nasud.
Ang mga sumbanan nga nakalatid sa atong batakang balaud sa paghimo og mga palisiya sa mga foreign policy makers sa gobyerbno mao ang national interest, national sovereignty, territorial integerity ug the right to self-determination.
Niining upat kanunay gayod nga mopatigbabaw ang national interest o interest sa nasud.
Ang mga ordinaryong tawo nga wala maghupot og katungdanan sa nasud dili makasabot niini tungod kay maoy ilang gipatigbabaw ang kaugalingon nga pagbati o gibati ug dili ang interest sa nasud.