Tungod sa nahitabong aksidente didto sa Boljoon nga mikalas ug daghang kinabuhi, mimando si Gobernador Garcia nga repasohon ang mga polisiya sa paggamit sa mga dump trucks paghatud og mga pasahero. Lisod ipatuman ang maong mga polisiya kay gawas nga walay laing kapasakyan labi na didto sa mga kalungsoran, ang kadaghanan usab natong nagtoo nga ang tanan gimbut-an man sa Kahitas-an. Matud pa sa akong silingan, “Kon patay, aw, patay jud; bisan naghigda ra sa lantay!”
Double black apan dili ilimnon
Gilaraw sa Provincial Government nga ipa-blacklist ang kontraktor nga WT Construction, Inc. (WTCI) human nga wala kini manumbaling sa gihatag nga 48 oras nga ultimatum aron pag-backfill sa nakalot nga lugar diin pagatukoron unta ang P1.3B nga Provincial Resource Center nga edipisyo. Kon mahinayon kining laraw, makatilaw ug DOUBLE BLACK ang WTCI, apan dili kadtong mahalon nga ilimnon’g makahubog, kon dili BLACKLIST sa pangontrata ug BLACKEYE sa ilang pangalan.
Planohon aron dili baha-on
Gikataho nga ang tulo ka mga kagamhanang lokal sa Cebu City, Mandaue City ug Talisay City magapahigayon og “Traffic and Flooding Summit” aron matabangan ang pagsulbad sa suliran sa baha ug trapiko. Hinaut nga wala lang pud unta’y grabeng baha ug trapiko sa mga naasoy nga dakbayan atol unya sa adlaw sa summit. Angayan kining planohon!
In aid of re-election
Naglaum si Senador Vicente Sotto III nga ang ika-18 nga Kongreso nga gilangkuban sa Senado ug sa Ubos Balay Balaoranan aduna unya’y panagtambayayong sa pagpanday og balaod alang sa kalambuan sa nasod. Apan sayod ang katawhan, bisan wala giklaro pagsulti sa Senador, nga ang tumong sa maong pamahayag mao ra ang pagpasiatab aron maseguro na usab ang ilang kadaugan sa sunod eleksyon. Basta politiko, tanan isulti ug buhaton, pulos gayod “In Aid of Re-Election”. Faeetz!
Nagyampungad ra sa tv
Atol sa away nila ni Pacquiao ug Thurman, nagkanayon ang kapolisan nga walay natala nga krimen sa tibuok siyudad sa Sugbo. Ang kadalanan ingon man, walay nasinati nga kahuot sa trapiko. Kini tungod kay ang tanan, lakip na ang kawatan ug badlongon nga mga drayber nanan-aw man sa salida sa away ni Pacquiao ug Thurman. Pagkahuman sa away, nagkaguliyang na ang katawhan kay diha na nahibaw-an nga nakawatan na diay ang panimalay apan wala lang mabantayi kay ang tagbalay nagyampungad ra sa TV. Hala no?
Personal greetings!
Ako’ng kinasing-kasing nga pagtimbaya sa katawhan sa Lungsod sa Padre Burgos, Southern Leyte, kinsa karong adlawa, July 25, nagasaulog sa kapistahan sa among mahal nga Patron, Senyor Santiago Apostol (St. James, the Apostle). VIVA SENYOR SANTIAGO!!!