Hangtod sa sunod siglo
Kun di pa tungod sa kamanggiluy-on nilang Dr. Jose “Sir Dodong” Gullas ug anhing Sir Juanito Jabat, di gyud unta ko makat-on sa pagsuwat. Pila ka tuig sa wa pa ko mahimong magsisibya niadtong 1984, magtatampo na ko sa The Freeman.
Si Mr. Jabat ang nangunay pagdawat sa labing una nakong tampo. Nga gawas nga sinuwat sa kamot sa yellow pad, nagum-os ug nabasa sa singot kay ako ra mang gibitbit samtang nagbaktas gikan sa Colon. Gidasig ko niya pagsige og suwat. Gipakaingon nako nga bilib siya sa akong sinuwat.
* * *
Hangtod nga akong nahibaw-an nga mao sab diay ang iyang gihimo ngadto sa tanang bag-o nga mga magtatampo. Nga maoy labing nakapalahi niya sa ubang mga editor sa mga pamantalaan niadtong higayona.
Gisuginlan ko ni anhing Cerge Remonde, nga mao say nihatag nako sa unang kahigayonan isip magsisibya, sa kalisod sa iyang pagsugod og suwat. Ang unang lima niya ka sinuwat gilabay sa editor sa basurahan sa way pagbasa bisan sa unang linya. Kun sama pa og taras si Mr. Jabat, wa gyud unta ko kaangkon og pagsalig sa kaugalingon.
* * *
Nangahas ko og panghuwam sa makinilya sa akong uyoan nga si Tiyo Loring sa Tabunok, Talisay (kay nagpuyo pa man mi niadto sa silingang barangay sa San Isidro) aron nga di maglisod si Mr. Jabat og basa sa sunod nakong mga tampo.
Ambot unsay gisulti ni Mr. Jabat ngadto ni Sir Dodong, ila kong gitanyagan nga mag-lindog sa Banat News ug The Freeman. Nisugot pa gyud nga ngan sa akong mga programa sa radyo maoy himuong ulohan bisan nagbalhin-balhin ko og sibyaanan.
* * *
Mahimo ra gyud untang ibasura ni Mr. Jabat ang una nakong tampo ug pakapinan og pahimatngon nga di na ko magsamuk-samot og hatag og sinuwat nga mga tampo. Mahimo ra gyud untang mo-insistir si Sir Dodong sa pagpangita og mga maglilindog nga tinuoray gyud mga makamao.
Wa ko mag-inusara. Gatosan mi nga ilang gihatagan og bililhong sinugdanan. Sa way pag-ihap sa ilang way kinutoban nga pailob ug pagmatuto una hingpit nga makat-on sa among gimbuhaton. Ilang kamanggiluy-on dakong tampo sa paglahutay sa The Freeman sa kapid-an ka katuigan human sa iyang unang siglo.
* * *
- Latest
