Dihang gitayhopan og kinabuhi sa Ginoo kining pobreng uyamot, nasayod ako nga duna Siyay rason. Akong naamgohan nga importante gyud diay ang buhi pa ta. Ang maalamong sila si Papa Inting ug Mama Pining miingon “Dodong, remember always that life is a gift and that you and I are living on borrowed times, it is always better to be kind as kindness is the mother of all virtues and gratefulness, the father of our being.” Kapin lima ka dekada na ang milabay dihang nananghid ko nila nga akong buhion ang The Freeman, abtik kaayo si Mama Pining nipasidaan nga kinahanglang mananghid sa ako kang Tiya Hilda ang biyuda sa founder sa The Freeman nga si Tiyo Paulino Gullas, ug sa laktod pagkaestorya nabuhat ko kadto.
Dili sayon ang pagbanhaw og balik sa The Freeman. Tinabangan sa akong giisip nga igsuon, Mr. Juanito Jabat, kinsa grabe kaayo ka mapahiubsanon, ang akong giisip nga Man Friday, Mr. Balt Quinain ug ang pila ka buok nga staff sa J and J Printers, nakapagawas kami sa labing unang issue sa The Freeman niadtong 1965. Sunod nga hagit nga akong gisuklan, nagagikan ni Senador Jerry Roxas nga amigo sa akong igsuong si Eddie. Si Roxas nag-ingon, “Dodong, if you want The Freeman to become closer to Cebuanos, make it a daily local paper.” Nalipay ko nga akong gidawat ang hagit. Di malalis, ang mga katuigan sa Martial Law krusyal sa Philippine journalism apan nakalahutay kami sa mangitngit nga panid sa kasaysayan sa nasud ug nagpabiling fair and fearless sa pagbalita. Bisan gibiyaan mi sa pipila namo ka mga kauban aron mobalhin sa lain, wala kami malup-og ug padayon gihapon kami hangtud karon.
Sa dihang naghiusa ang Star Group pinangulohan sa akong giisip nga manghod, Miguel Belmonte niadtong 2004, ayha pa ko nakaingon nga panahon na tingaling magmenor ug tagamtamon ang kaanyag sa kinaiyahan, ang baho sa mga buwak ug maminaw og maanindot nga mga karaang kanta. Makapatandog gyud kaayo nga kadtong gamay nakong gihimo nagbilin og tambok nga yuta nga nagpaabot pa og bag-ong binhi aron molabong. Ang bugtong nakong kauban si Sr. Sto. Niño, ang proteksyon sa Sacred Heart of Jesus, ang mabinantayong mga mata ni Mama Maria ug pag-ampo sa akong igsuon, Servant of God, Bishop Teofilo Camomot, nasayod kun mabuhat pa pa gihapon nako kini.
Nan, puno sa pagpasalamat nga bulahan akong nakasaksi sa ika-100 nga kasumaran sa legasiya sa akong Papa Inting ug Mama Pining, ang University of the Visayas isip ilang "janitor" ug isip "cub reporter" sa legasiya sa akong uyoan Tiyo Paulino Gullas, sa The Freeman. Nagpasalamat ako sa tanang mga kaubanan sa The Freeman nga wala mobiya sa panon.