Mas mahimo ba kahang sayon ug walay hasol para sa mga Pilipinong gustong manarbaho sa abroad kung ang gobiyerno na maoy mangunay pagpang-rekrut og empleyado para sa mga kompanyang nagkinahanglan og mga trabahante?
Si Pres. Duterte nagtinguhang maghimo og buwag nga departamento nga pagatawgong Department of OFWs. Ang plano sa presidente makapakulob sa kaldero niining mga negosyanteng nanag-iya og mga recruitment agencies. Sa pikas bahin epektibong maputol kining modus sa mga illegal recruiters tungod kay ang mga tawo nga naedukar bahin sa hustong proseso sa pagpangaplay sa abroad dili na basta mapatuo ug mailad niining mga pekeng recruitment agencies.
Gawas pa, duna say mga recruitment agencies nga wala gyud magtagad sa kahimtang sa mga OFWs nga ilang gipadala ngadto sa abroad.
Pipila sa mga gi-deploy sa abroad ilabi na sa Middle East ang giabuso sa ilang mga employers ug wala mosunod sa unsay nalatid sa kontrata.
Gipasa ra sa mga recruitment agencies gikan sa Pilipinas ngadto sa laing recruitment agency didto sa abroad ang mga aplikante.
Hinungdan nga lisod pangitaon ug matabangan kining mga giabusarang mga OFWs.
Apan praktikal ba nga magtukod og bag-ong ahensya o pag-usik lang sa pundo sa gobiyerno?
Duna namay ahensya nga gitahasan para sa kaayohan sa mga OFWs sama sa Department of Labor and Employment (DOLE) pinaagi sa Philippine Overseas Employment Administration (POEA).
Ang POEA mao ang nag-regulate niining mga recruitment agencies samtang ang Overseas Workers Welfare Administration gitahasan nga siguraduhon nga luwas ug maayo ang kahimtang sa mga OFWs sa ilang gitrabahoan sa abroad.
Unsa may buluhaton sa bag-ong departamento nga dili mahimong ipatrabaho sa kasamtangang mga ahensya sa POEA ug OWWA? Dili ba regulasyon gihapon ug proteksyon sa mga OFWs?
Dili ba diay mahimo nga mandoan nalang ang maong mga ahensya nga pahugtan pa ang mga regulasyon niini ug hatagan og ngipon aron mokinto kining mga recruitment agencies aron di magbinuang?