Pagpadayon sa legasiya

Giisip ko ang akong kaugalingon nga murag revivalist o kadtong tawo nga gustong buhion kadtong himatyunon nga kawsa o kalihokan. Ganahan ko nga ipadayon ang mga handumanan ug paghatag og bili niini tungod kay kini gihagoan sa mga tawong duol sa akong kasingkasing, ilabi na kun kini nakatabang sa uban ug nahimo nilang legasiya.

Klaro pa kaayo sa akong panumdoman dihang si Mama Pining miawhag ni Mr. Tony Falcon, usa sa mga magtutudlo sa grade school nga mangita og mga batang lalaki nga mahimong bansayon alang sa pormahon nga all-boys choir niadtong dekada 70, silang tanan gihatagan og scholarships aron sila makatiwas pag-eskuyla. Kay mahiligon man si Mama Pining sa musika, ang iyang unang katuyoan niini mao ang pag-awit para sa Kahitas-an ug sunod na ang para sa Unibersidad.

Tuod man, nakadaog gyud ang maong all-boys choir sa National Music Competition for Young Artists Award (NAMCYA), sila ang unang Cebuano choral group nga nakadaog niini. Apan ang maong choir nabungkag dihang nitaliwan akong Mama niadtong 1984. Tuig 1999 gibuhi nako pagbalik ang choral tradition agi og pagtahod sa akong inahan, gitukod nako ang University of the Visayas Choir nga gilangkuban og mga batang lalaki ug babaye gikan sa high school.

Subo lang nga niadtong 2006,  nakasala ang kanhi choirmaster ug nadesisyonan nako nga bungkagon ang grupo. Apan ang mga miyembro miduol kanako ug mipahibalo nga ang pag-awit para sa choir maoy hinungdan nga duna silay scholarships. Sa akong pagsubay, nahibaw-an nako nga sagad kanila anak sa mga kabus nga pamilya. Tungod niini, nabalik ang akong gana pagpadayon sa grupo apan giusab na ang pangalan ug gitawag nang UV Chorale. Akong gibutang ang akong kapikas nga si Nena isip Chorale Manager. Gihangyo nako si Atty. Dodong Baduel nga mangita og babayeng conductor sa Manila.

Kining subling pagsugod gikan sa sinugdanan nangahulogan nga kinahanglan may tumong ug direksyon ang grupo.  Gusto namong duha ni Nena nga mailhan ug mahimong hanas sa musika ang mga bata pinaagi sa pagkuha og maayong magtutudlo sa musika. Gidungog among pag-ampo, nakaplagan namo si Ms. Anna Tabita Piquero, sakop sa UP Madrigal Singer nga nakabase sa Manila. Sukad niadto, lahi na gyud ang chorale.

Ang una nilang international competition nga giapilan gihimo didto sa Busan, South Korea niadtong 2007. Dihang giawit sa grupo ang Green and White March, ang UV Anthem, nakaingon ko kang Nena nga nadungog na ilang awit sa kalibotan. Sa ilang pag-awit sa atubangan sa mga langyaw, di masukod ang akong kalipay.

Niani sila og daghang mga pasidungog ug pag-ila dili lang dinhi kondili sa gawas sab sa nasud.

Tuig 2010, nalakip ang UV Chorale sa Ani ng Dangal Awardees, usa ka pag-ila sa mga Pilipinong gihatagan og mga pasidungog sa ubang nasud. Ang ilang panaw lisud ug daghang pagsuway. Dihay kausa nga kinahanglan nakong ilisan ang tibuok training staff. Tingali pinaagi sa Espiritu Santo, walay kakulian kaming nasugatan. Niini lang bag-o, giimbitar ang UV Chorale sa Joint International Choral Concert sa Osaka, Japan. Usa kini ka timailhan nga nailhan ang UV Chorale didto, gani nagpusok-pusok ang mga pagdayeg gikan sa mga netizens diha sa social media tungod adto.

Ako pirmeng mahinumdoman ang akong Mama Pining kay siya may nagsugod aning tanan ug ako lang gipadayon apil na ang paghatag og maayong kaugmaon niining mga talendarong kabataan.

Kaming duha ni Nena padayong nangindahay nga ang UV Chorale kanunay magdala og dungog dili lang sa UV kondili sa Sugbo ug sa nasud. Nga magpadayon sila paghikap sa mga kasingkasing ug makapatulo sa mga luha sa mga mahigugmaon sa musika.

Sama ra kini sa akong pagbuhi pagbalik sa The Freeman. Motuo ako nga mao kini ang dakong kontribusyon para sa Sugbo sa akong uyoan nga si Don Paulino. Ang iyang mabulokon apan mubo nga kinabuhi ug karera sa politika tingali nakalimtan na, apan nagpabilin ang The Freeman nga magselebrar na karon sa ika-100 nga anibersaryo.

Kining inspirasyon gikan sa gamay lang kaayong kasinatian among panag-uban sa akong uyoan, pinaagi sab sa pagtugot sa iyang kapikas nga si Tiya Hilda, ug sa akong amahan nga si Don Vicente Gullas ingon man sa akong Mama Pining, gibuhi nako pagbalik ang pamantalaan niadtong 1965 ug kini magpabilin hangtud sa mosunod pang 100 ka tuig.

Dako ko og utang kabubut-on sa akong higala nga si Mr. Juanito Jabat dihang iyang gisugyot ang pagtukod sab og pamantalaan sa pinulongang Bisaya, ang Banat News nga 25 na ka tuig karon.

Ang akong desisyon pagsanong sa iyang sugyot sa walay paglimod, maayo gyud. Ang Banat News nagmantala og lokal nga mga balita nga dunay timplang Sugbuanon nga duol sa mga kasingkasing sa mga Sugbuanon.