Nganong daring ka man kaayo?

Kini ang pangutana nako sa usa ka higala sa dihang nasayran niya nga nangarasti ko sa paghimo og mga proyekto alang sa simbahan sa Mohon.

Sa tinud-anay lang lisud baya gyud sanglit kun maghisgot kita og pundo wala gyud tawon.

Ako gani mismo naproblema sa akong kaugalingong seguridad.

Giampo lang nako nga walay mga dinagkong sakit o problema nga moabot sa akong pamilya ug sa akong panglawas mismo.

Salamat na lang kay gipatalinghugan sa kahitas-an.

Mao nga bisan pa man kun lisud ang panahon padayon lang sa gihapon. Kini tungod kay duna koy gisaligan.

Gisaligan ko ang pag-amoma sa Dios. Bisan pa man sa mga higayon nga bation o ang mga pagduda apan gipamatud-an sa Dios nga siya ang labaw ug maoy magbuot sa tanan.

Mao nga dili maayo nga kita magpunay lang og salig sa atong kaugalingong katakus.

Ang tawo nga nahimong mapahitas-on sa pagtuo nga anaa na niya ang tanan daw sama sa mga abog nga itaktak sa gikan sa sandalyas.

Kay bisan gani ang atong nahuptan ato ramang biyaan. Sa laing bahin mas maayo nga mohimo kita og DARE diha sa atong kinabuhi. Nagpasabot kini og:

DISCIPLINE kun disiplina. Aron makuha nato ang atong gusto atong himoon ang pagdisiplina sa atong kaugalingon gikan sa mga kahilig nga dili maayo ug makalaglag kanato.

AVAILABILITY sa mga kahigayonan ug oportunidad sa kinabuhi. Kun dili kiita mosuway og hangop sa mga kahigayonan nga moabot unsaon man nato pagkab-ot sa atong mga damgo?

RESPONSIBILITY kun kaakuhan. Matag kalampusan dunay tugbang kaakuhan. Kun molampus ta nan, mas nidaghan ang atong kaakuhan alang sa uban ug sa atong kalikopan.

ENERGY - kun enerhiya nga bisan pa man sa naghinubrang kalisdanan padayon natong gambalayon ang ritmo sa inspirasyon kay mawala ang ritmo sa inspirasyon unsaon man nato pagpadayon?

 Hangak man tuod usahay ang kinabuhi apan wala kini magpasabot nga malisud alang nato ang pagkab-ot sa atong gusto sa kinabuhi.

Dare lang ta nang Dare matud pa ug sa kadugayan makuha ra gihapon nato ang atong gusto tinabangan sa grasya sa Dios.