Talagsaon nga halad
Nadapit ang pagtagad sa pipila sa nanambong sa Grand Halad sa Kapamilya sa main campus sa Cebu Technological University (CTU) gahapon pagkakita nila og lalaki nga nagpuwa kansang bukubuko gikuptan og napawongan og kahayag nga gisundan og laing tulo pa nga sama niya og kakulian.
Nihangyo ang lalaki nga nagpuwa sa mga guwardiya sa CTU mahimo ba nga pasudlon ang iyang mga kauban kay apil diay sila sa mga niboluntaryo sa paghatag og libreng masahe sa mga masakiton, senior citizens ug uban nga nanambong sa labing dakong piyesta sa libre nga mga pangalagad.
* * *
Samtang gisusi sa mga guwardiya ang katinuod sa ilang pangangkon, nakalingi ang mga nakuryuso nila sa naghunong nga taxi duol sa gate nga way drayber ni pasahero nga nagpasiga sa hazard lights.
Diha pa sila nakaamgo nga ang lalaki nga nagpuwa, nga wa mobiya sa gate hangtod nga natino nga nakasud ang iyang mga kauban ug gigiyahan sa mga guwardiya, mao ang drayber sa taxi ug ang nagsunod niya nga upat ka napawongan og kahayag mao ang iyang mga pasahero. Natandog sila sa pasundayag sa talagsaon nga pagtabang.
* * *
Usa nila si Klasmit Yul Julia, suki nga tigpaminaw sa DYAB Abante Pa, Bisaya! ug aktibo nga tigpaluyo sa Grand Halad. Nisamot ang iyang bilib kay daghan og kaila nga taxi drivers nga nikumpisal nga labihang hasola kun masakyan og mga pasahero nga may kakulian sa panglawas, labi na gyud sa mga napawongan og kahayag.
Giila-ila dayon ni Klasmit Yul ang drayber, gipikpik ang abaga ug hingpit nga gipasidunggan. Mahinangpon niyang gipahibawo ang maayong buhat ngadto ni Atty. DX Lapid kay naatol man sa tulomanong “Timbangan sa Hustisya” sa Integrated Bar of the Philippines (IBP) Cebu Chapter.
* * *
Ang matinabangong taxi driver mao si Cayetano Canizares, lumad nga taga Barili sa kasadpang Sugbo. Wa siya managana pagpasakay sa upat ka napawongan sa kahayag ug natandog kaayo pagkahibawo nga bisan sa ilang kakulian motampo sa ilang panahon sa pagtabang sa mas nagkinahanglan.
Maong inay pakanaugon lang ang upat, iyang giagak ug giseguro nga makasud sa CTU. Tinuod gyud diay’ng way kublan sa batobalani sa maayong buhat. Hinaot nga mas daghang makabig ug matakdan sa ilang kamanggihatagon.
- Latest
