EDITORYAL - Baha lang gihapon

Opisyal nga nagsugod ang ting-uwan ug magsugod na sab ang kalbaryo sa publiko niining pagbaha nga mosulod sa kabalayan ug mga establisamento.

Baha nga pila na ka mga katuigang hangtud karon wala pa gihapon masulbad sa lokal ug bisan sa nasyonal nga pangagamhanan.

Ang baha dili lamang nagdala og sakit ngadto sa katawhan kondili makabalda sab sa komersyo tungod kay inig bunok sa uwan daghan ang mangatanggong tungod sa taga-hawak nga tubig.

Dugay ra nga may mga plano ang nagkadaiyang local government units pagsulbad unta sa ilang problema sa baha: kawot diri, kawot didto.

Apan wala gihapon makasulbad sa problema kay pulos tanan ‘band aid solution’ lamang.

Karong molingkod na sa ilang pwesto ang mga bag-ong napiling lokal nga mga opisyales dinhi sa Sugbo karong Hulyo 1, maayong ang una nilang buhaton mao ang pagsulbad niini. Karong bahina sa tuig mao ang tinguwan ug haom lamang nga kini ilang unahon paghatag og pagtagad. Ang mga basurang plastic ilabi na kadtong single-use plastics mao karoy sagad makitang makabara sa mga kanal ug kasapaan.

Kun gikinahanglan mangayo og tabang sa kapolisan pagpangita ug pagdakop niadtong mga nagpataka og labay og basura ilabi na ang plastik diha sa mga kanal og kasapaan buhaton kini aron matagam ang mga gahi’g ulo. Apan karong higayona, maayong dili na sila mag-iyahay lang sa ilang pagplano. Kinahanglang may koordinasyon ilang mga plano aron nga sentralisado ang pag-atiman sa problema. Anhing bahina usab sila kinahanglang magkahiusa ug mokooperar sa usa’g-usa isip mga sakop sa Regional Development Council.

Mahimong usahon ang ilang tingog aron pagpangayo og tabang sa nasudnong kagamhanan pinaagi o inabagan usab sa Office of the Presidential Assistant to the Visayas.

Mag-unsa naman lang kanindot unya sa mga planong pag-moderno sa transportasyon dinhi sa Sugbo kun panahon sa tinguwan mangatanggong ra gihapon ang mga tawo?