Daghan seguro ang nakugang sa giluwatan nga pamahayag ni Presidente Duterte nga usa lang ka “simple maritime accident ang nahitabo nga pagbangga sa usa ka chinese vessel sa naka angkorahe nga Filipino fishing vessel sa Recto Bank Niadtong Hunyo 9.
Gani gikadismaya pa sa ubang mga opisyal sa kagamhanan sama ni Senador Panfilo Lacson nga miingon nga nagdugo ang iyang kasing kasing sa pamahayag sa pangulo.
Labaw na sa mga kritiko nga halos kondenahon na nila ang reaksyon sa presidente.
Kun magpadala ko sa akong emotion seguro mao usab ni ang akong bation kay lagi mopatigbabaw man ang kalooy sa atong isig ka Filipino.
Labaw na kun ipatigbabaw nato ang garbo nga dili magpalupig kay anaa sa atong teritoryo ang mga mananagat dihang gibangga sila ug wala pa gyud tabangi.
Apan suwayan kaha nato og sabot ang mga posibleng mahitabo kun si Presidente Duterte magpadala sa iyang emotion nga mangaway dayon sa China tungod sa gidangatan sa 22 ka mga mananagat, unsa man ang mahitabo?
Gubat? Mao ba ni gusto natong madungog gikan sa pangulo tungod lang kay dunay mga Pinoy nga mananagat nga nabanggaan sa mga intsik?
OA or “Over Acting” ra man seguro kaayo nga makiggubat ang nasod tungod kay naay mga mananagat nga nabanggaan.
Gawas pa dili man seguro sakayan sa armadong kusog sa China ang miatake sa atong sakayan nga igugubat nga gikinahanglan na gyud mohimo ug extreme action ang gobierno.
Kung moluwat og pamahayag ang pangulo nga mohagit sa China, kaya ba sa Pilipinas nga makig gubat kanila? Dili nalang ta patuga tuga.
Sakto ug haum ra ang pulong nga giluwatan sa presidente kay tinood man sad nga simple maritime accident ang nahitabo.
Walay nakalas sa mga mananagat luwas silang nakauli kinsa gihatagan sila og hinabang sa gobiyerno.
Hinoon dili angayan nga palabyon ang nahitabo, gikinahanglan nga lakang ang gobierno nga dili na mausab pa ang ingon niini nga aksidente apan ipaagi sa diplomasya.
Matag pulong nga luwatan sa atong pangulo nakasalalay ang relasyon sa ubang kanasoran, niining isyuha gigamit ni Presidente Duterte ang inutok nga lihok nga dili mabutang ang tibook nasod sa apiki nga sitwasyon tungod kay na hit and run ang atong mga mangingisda.