EDITORYAL - Palaaway nga silingan

Samtang tuod sayo pa kaayo aron magbaid og sundang ug dibdibon ang giingong tinuyo nga pagbangga sa Chinese fishing vessel sa panagatan sa 22 ka Pilipino diha sa Recto (Reed) Bank sakop sa Palawan, hatagan unta dayon kini og pagtagad ni Pres. Duterte.

Nahitabo ang pagbangga niadtong Domingo sa tungang gabii samtang ang mga mananagat sa MB Gimver 1 nag-angkorahe sa maong kadagatan kay namahuway ug nangatulog. Matud pa wala gyud bisan nalang silbato nga gihimo ang barko sa China diretso ra silang gidasmagan ug gibiyaan.

Mura og hit and run ang nahitabo gibiyaan ang mga Pilipino nga nagpautaw-utaw  sa dagat nga daw ang gipasabot, bahala na ang kapalaran kun unsay inyong dangatan tungatunga sa kadagatan sa West Philippine Sea.

Ang maong insidente nahitabo sa mismong kadagatan sa Pilipinas ug dili sa tugkaran sa China. Pagkadakong insult.

Kun gibuhat nila kini sa mga Pilipino sa kaugalingong teritoryo, unsa may tawag kanila? Maisip pa ba gihapon silang mga “buotang silingan?”

Bisan si Defense Secretary Delfin Lorenzana nikondenar sa gibuhat sa mga Chinese crew pagbiya sa mga Pilipino ug matud pa niya dili kini maoy gipaabot nilang taras gikan sa China.

Swerte nalang nga dunay panagatan sa Vietnam nga nakakita sa mga naglutawlutaw nga mga Pilipino ug gitabangan sila dayon gihatud balik sa Palawan.

Kun buot susihon, ang tuyo nga pagbangga masabot nga may dalang aligutgot ang habig sa Chinese fishing vessel sa mga Pilipinong mananagat. Apan lahi na ang estorya kun human dasmagi ug nalunod ang panagatan sa mga Pilipino, biyaan sila tungatunga sa dagat, matawag na kini gusto gyud silang pamatyon.

Hangtud karon, si Duterte kutob ra gihapon estorya bahin sa pagpanaugdaog sa China sa mga Pilipino sa kaugalingon nga teritoryo. May panghudlat pa siya kaniadto apan wala sa lihok.