Pag-ampo bisan way pangayoon

Padayon kong gihasol sa higala nako nga nangutana kun unsay matang sa pag-ampo ang angayang gamiton aron lang siya dunggon. Buot unta akong mosinta niini apan sugo sa pagpailob ako siyang giingnan nga kun may panginahanglan man o wala padayon gihapon kita sa pag-ampo.

Daghanan sa mga tawo ang niisip sa pag-ampo ingon nga usa ka vending machine nga kun imong ilitok ang pipila ka mga pulong moabot dayon ang imong pangayoon. Mura ba og: In the name of Jesus pancit Lutaw!”Ug kun dili gani mahitabo ang atong gusto bation dayon nato ang tumang kasagmuyo ug gani ang uban nato mangluod man sa Ginoo. Apan ingon ini gyud ning tawo functional ang pag-ila sa Ginoo.

Bisan sa akong kahimtang karon dili kaayo ko partikular kun unsang matanga sa pormula ang gamiton sa pag-ampo gawas lang tingali sa mga giisip nga standard sa atong simbahang katoliko. Ang mahinungdanon nga bisan taliwala sa ka busy sa kinabuhi mogahin ka lang og higayon sa pakighinabi sa tinuod nga Boss nga walay lain kondili ang Dios.

Sa akong bahin, sa dili pa ko mamahaw o human mamahaw o sa dayon nakong katulog mosangpit gyud ko sa Ginoo. Hinuon dili tanang higayon ang maong mga pag-ampo puno sa pagdayeg dunay mga pag-ampo nga buot lang mopadayag sa tinud-anay nga gibati sa kinabuhi. Sayud ko nga bisan kini ang akong malitok padayon gihapon ako niyang sabton ug gani sa kaulahian molihok ang Dios sa paagi nga lisud sabton.  Apan ang pahinumdom niya mao nga dili ug dili gyud siya mobiya kanako.

Ning maong kamatuoran angay kong magsalig nga bisan sa tawhanong kahuyang anaa ang Dios nga mobulig sa kanunay. Dugang pa, gikinahanglan usab kini aron ang tawo nga sama nato dili mamahimong mapahitas-on sa pagtuo nga makahimo na kita bisan way pagtuo ni relihiyon.

Ang pagkamapaubsanon dili lang usa ka birtud kondili usa kini hiyas nga makapahimo sa tawo nga dalaygon atubangan sa Dios ug sa iyang isigkaingon. Kay sama sa ubang tawo kita mga abog lamang ning kalibutan nga gipuy-an.

Kini ang gamit sa pagpaubos ingon nga usa sa mga religious themes diha sa paghimo og counseling sa atong isigkaingon. Daghan sa mga tawo ang nalumos sa ilang insecurities nga tungod niini mo project sila og mga personahe ingon nga pagtabon sa ilang vulnerability.

Ning paagiha nahimong daw mechanical ra kaayo ang ilang pagsabot sa usa ka relasyon mao nga ingon ini usab ang ilang pagsabot sa kinabuhing espirituhanon. May kinahanglan man o wala sangpit gihapon sa Dios.