Pagtago sa sakit
Nitumaw ang mga huhungihong nga ang presidente may seryuso nga sakit nga nisangpot na sa mas grabe nga komplikasyon. Gikataho nga usa sa naapektahan mao ang iyang kidneys.
Tungod sa iyang balatian, namatikdan nga nagkadaghan ang kahigayonan nga nakit-an siya nga gikapoy. Labi na sa mga higayon nga nabantang sa daghang mga tawo sa kampanya sa piniliay.
Kinahanglan gani siya nga agakon pagsaka ug pagkanaog sa mga entablado sa iyang mga pakigpung.
* * *
Pipila ka tinubdan nagbutyag nga ang presidente labihan nang luyaha nga wa nang katambong sa gitakda niyang mga tigom ug wa igkita sa publiko sud sa pila ka adlaw.
Matag higayon nga naulian sa iyang kahimsog, napanid-an nga mas luya na kay sa nangaging mga higayon.
Namatikdan sab nga nagkadaghan ang mga adlaw nga di siya igkita. Ang tagsa lang ka adlaw sa una nahimo nang duha, dayon tulo, ug dayon lima. Ug nagkasagunson ang mga higayon sa kalit niyang pagkahanaw.
* * *
Kusganon hinuon nga gipanghimakak sa iyang tigpamaba nga masakiton ang presidente. Matod sa tigpamaba kanunay nga makit-an sa publiko ang presidente.
Nga nakalahutay sa daghan niyang kalihokan nga gitambongan. Niinsistir ang tigpamaba nga di na unta magpakita sa publiko ang presidente kun di pa siya himsog.
Bisan sa pasalig sa Malakanyang nga way sakit ang presidente, nabantang siya sa nasudnong telebisyon sa pila ka higayon nga naglisod sa pagsaka ug pagkanaog sa pipila ka ang-ang sa hagdanan.
May mga higayon nga nibarag siya ug ang mga guwardiya dali nga ni-agak niya.
* * *
Ang kasayuran sa ibabaw gimantala sa kalibotanon nga mga pamantalaan 33 ka tuig na ang nilabay, kay kasagaran sa mga pamantalaan sa Pilipinas nahimo mang mga turutot sa pamunoan. Gihulagway sa langyaw’ng media si anhing Presidente Ferdinand Marcos nga nangampanya sa snap presidential election batok ni anhing Presidente Corazon Aquino niadtong 1986.
Human sa pila ka semana, napamatud-an ang mga pagduda sa grabeng sakit sa presidente. Nakit-an ang hospital bed ug tanang kahimanan sa pagtambal niya dihang sa kataposan nakasud ang publiko sa Malakanyang.
Pila ka takna human napugos sa paglayas ang presidente ug ang mga sakop sa iyang pamilya ug labing suod nga mga negosyante ug mga alyado sa politika.
* * *
- Latest
