EDITORYAL - Mandatory ROTC

Himuon na pagbalik nga mandatory ang Reserve Officers Training Corps dinhi sa Pilipinas. Napasar na sa Ubos Balay Balauranan sa ikatulong pagbasa ang maong balaudnon.

Kun mahimo na kining balaud, himuon na kining rekisitos para maka-graduate kadtong mga baskog ang panglawas ug kadtong dili mga varsity players ug kadtong nakapaubos na og susamang military training nga naa sa grade 11 ug 12.

Ang ROTC naputos sa kontrobersiya kaniadto tungod sa kurapsyon ug hazing nga binuhatan sa mga kadeteng opisyales ngadto sa ilang mga ubos nga kadete.

Tungod sa maong mga reklamo ug pasangil, gihimong optional ang ROTC sa kolehiyo ug gipatuman ang National Service Training Program (NSTP) pinasikad sa   Republic Act 9163, otherwise known as the “National Service Training Program (NSTP) Act of 2001.”

Duna kini tulo ka  program components, nga mao ang Civic Welfare Training Service (CWTS), the Literacy Training Service (LTS) ug ang Reserve Officers’ Training Corps (ROTC), mamili ang mga estudyante sa tulo.

Sa CWTS ug LTS programa kini aron makat-on ug mosalmot sa nagkalain-laing civic activities ang mga estudyante. Naglakip kini sa pagpananom og kahoy, pagpanglimpyo, pagtudlo sa mga bata diha sa kabarangayan ug uban pa.

Samtang ang pagpreparar pagdepensa sa nasud panahon sa gubat ubos kini sa ROTC para sa mga piniling kurso ug niadtong mga estudyanteng mas gusto niini.

Sa NSTP, pareho gihapon og tumong nga mao ang pagtudlo sa mga estudyante og ‘sense of patriotism’ ug pagmahal sa nasud.

Kinahanglang usbon ang mga programa sa ROTC ug dili lang pulos martsa-martsa sa udtong tutok.

Apan kinahanglan sab nga aduna gyuy gahom ang DepEd sa ROTC aron di na masubli ang kurapsyon ug mga pagpangabuso.

Dili malalis nga lahi ra ang programa sa ROTC kun itandi sa CWTS ug LTS ilabi na sa disiplinang makat-onan sa mga estudyante nga sa umaabot nga panahon ang Pilipinas gihapon maoy mabulahan.