Ang security digital (SD) cards sa Commission on Elections (Comelec), nga maoy sentro sa kontrobersiya sa kalangay sa iskutenyo sa pipila ka presinto nga nakapalangay sa proklamasyon sa mga mananaog, way kalainan sa memory cards nga gigamit sa kasagaran sa atong mga telepono ug kamera.
Mora ra kadako sa kuko sa tudlo, ang SD cards makapaburot sa kapasidad sa atong gadgets. Mahimong masudlan og kaliboan ka hulagway ug pila ka oras nga video footage. Mahimo ganing gamiton nga morang USB flash drives aron pagbalhin sa data gikan sa usa ka gadget ngadto sa lain.
* * *
Di magamit ang vote counting machines (VCMs) sa mga presinto kon way SD cards. Kay maoy motipig sa mga hulagway sa gimarkahan nang mga balota nga gilawog sa mga botante ngadto sa VCMs. Dunay duha ka SD cards sa matag VCM: Ang main card ug ang contingency card. Kasagarang mga hinungdan sa pagpalyar sa SD cards:
Wa magtakdo ang data sa main SD card ug sa backup SD card; ug
Naluag ang SD cards sa butanganan sud sa VCMs atol sa pagbiyahe gikan sa ulohang buhatan ngadto sa nagkalainlaing dakbayan ug kalungsoran.
* * *
Sa pasiunang pakisusi sa kadagkoan sa Comelec nahibaw-an nga mas daghang SD cards ang nadaot sa piniliay niadtong Lunes kay sa nangaging automated nga mga piniliay tungod sa mosunod:
Bati ang kalidad sa nakompra nilang SD cards kay napugos sila sa paghatag sa kontrata ngadto sa labing barato nga supplier nga nidaog sa subasta; ug
Mas maayo ang kalidad sa SD cards sa nangaging mga piniliay kay gihiusa ra pagsubasta uban sa VCMs ug ubang kahimanan sa piniliay.
* * *
Kon nahibung ka nganong nasiyam-siyaman pag-ayo ang SD cards, subaya palihug ning kuting mga lagda sa Comelec:
Ipada ang depektusong SD cards sa technical hubs sa Sugbo ug ubang rehiyon nga giduma sa Department of Information and Communications Technology ug Department of Science and Technology;
Kon di gyod maayo, pahibaw-on sa superbisor sa Department of Education ang National Technical Support Center (NTSC) ug ang Election Officer sa lungsod o dakbayan; ug
Pahibaw-on sa NTSC ang Project Management Office sa Comelec nga mao ray makatugot sa pag-ilis sa SD cards.
* * *