Nagsugod ko og susi sa website sa Commission on Elections (comelec.gov.ph) sa niaging semana pagpangita sa akong presinto aron di na mapul-an og pangita sa piniliay ugma puhon. Apan wa nako igkita ang ilang “Precinct Finder.”
Nagpalaban ko sa Google. Nga nitultol nako sa katin-awan sa Comelec nga di pa maggamit ang “Precinct Finder” button kay giayo sa Department of Science and Technology (DOST) aron pagpanalipod sa pribadong kasayuran sa mga botante. Nisugyot sila pagtawag sa 02- 526-7769 o pag-email sa voters_id@comelec.gov.ph o itd@comelec.gov.ph.
* * *
Nag-email ko nila sa kasayuran nga akong nahinumdoman nga gipangayo sa karaang “Precinct Finder:” Tibuok nakong ngan, pinuy-anan ug petsa nga natawhan. Wa koy nadawat nga tubag human nagpaabot og pipila ka adlaw. Maong nitawag ko sa ilang landline niadtong Biyernes sa buntag.
Giingnan ko sa nakatubag nga mas dali silang makatubag sa Twitter. Giawhag ko nila sa pagpada sa samang kasayuran pinaagi sa direct message sa @radyocomelec. Siyam ka oras human ko nag-tweet, nipahibawo sila nga naayo na ang “Precinct Finder” ug gihatagan ko nila sa link.
* * *
Ako dayong gisuwayan: Gipabutang gihapon ang first name, middle name ug last name apan wa na mangutana sa petsa nga natawhan; papilion gihapon sa imong lalawigan, dayon dakbayan o lungsod; ug human sa pipila ka gutling pahibaw-on na sa ngan sa eskuylahan ug numero sa presinto kon naa ka pa sa listahan sa rehistradong mga botante.
Kun di dayon igkita ang imong ngan awhagon ka nila sa paghimo og laing search. O sa pagtawag sa ilang landline o pag-email nila. Nabalaka hinuon ko nga, kun ang kapaspas sa ilang pagtubag nako ang pasikaran, liwas na sa piniliay ka matubag.
* * *
Kun imong i-click ang nahibalik nang “Precint Finder” button sa Comelec website pahibaw-on gihapon ka nga giayo pa sa DOST. Maong nangahas ko pagmubo sa link nga ilang gipada nako: tinyurl.com/aribotar.
Dihang akong gi-post sa Facebook ang link, daghang nakakuha dayon sa numero sa ilang presinto apan nasangit ang pipila kay wa maabli ang dropdown sa mga dakbayan ug kalungsoran. Kun mao say masugatan nimo, palihug ginhawa og lawom ug suwayi pag-usab.
* **