Kita ang mga karnero

Mayo 12, 2019: Ika-upat nga Domingo sa Pasko sa Pagkabanhaw

Mga Pagbasa:    Buh. 13;14,43-52/Sal. 100/Gip. 7;9,14-17/Jn. 10;27-30

Nahimo nakong paborito nga imahen ang usa ka karnero. Mao nga diha sa akong mga timaang personal dili gyud mawala ang imahen sa karnero dili tungod kay natawo ko sa tuig sa mga karnero ug sa laing bahin nahimo nakong zodiac sign ang Capricorn. Dunay mas halawom pa kini nga kahulogan sa atong kinabuhi. Kaniadto ang mga karnero nakaila sa ilang mga magbalantay.

Sa laktod duna silay close connection sa usag usa. Ang usa magbalantay nakaila dako uyamot sa iyang mga karnero ug ang mga karnero nakaila sa ilang magbalantay.

Ang tinuod nga magbalantay andam ug tagana nga mohalad sa iyang kaugalingong kinabuhi mapanalipdan lamang ang mga karnero gikan sa mga mabangis nga mga lobo nga andam ug tagana nga mobiktima kanila wa pay labot sa mga kawatan nga ang tumong ug tuyo mao ra gyud ang pagpangawat.

Sa laing bahin ang maong imahen nipahinumdom sa karaang panahon sa mga lider nga gitawag aron mamahimong mga magbalantay ngadto sa katawhan ang Israel. Gidapit sila nga unta mamahimong mga pangulo sumala sa kasingkasing Diosnon.

Apan sa laing bahin nahimong daw salikwaot ang ubang mga pangulo sanglit sila mismo ang niunay sa panon nga gisangon kanila. Dili lang sa mga pangulo sa natad sa politika kondili apil na usab sa natad sa conventional religion.

Ang nahitabo mao nga ang mga magbalantay nga angayang mopakaon sa ilang panon ang nahimo naman nuong naniguro sa ilang kaugalingong katagbawan. Butang nga wala mahasubay sa tinuod nga tahas sa pagka magbalantay.

Sa akong personal nga pagpatidlum nakita ko ang akong kaugalingon nga daw nabug-atan ug nahasi sa kaugalingong tanlag sa mga higayon nga wala nako mahimo ang gisangon kanako sa Magbalantay.

Tungod ba kaha sa akong tawhanong kakulangan nakita ko ang akong kaugalingon nga naglisud pagtuman sa bisan unsang angayang buhaton.

Ang tentasyon nga mosubay lamang sa bisan unsang sayon ug likayan ang bisan unsang lisud. Dili tuyoon nga bation ko ang kahaw-ang sa matag higayon nga itandi ko ang akong nabuhat ug mohimo og mga lakang aron buhaton ang bisan unsang buluhaton tungod ug alang sa gitawag nilang kasayon.

Apan alang sa unsa pa? Ning katilingbanong adlaw sa Pag-ampo alang sa mga Bokasyon pangayoon nato nga ang mga hunahuna ug pagbati sa kaparian sa tinud-anay nga kahulogan sa ilang kinabuhi.

Dili kini mahitungod lang sa ilang kinabuhi ingon nga mga pinili kondili mahitungod usab kini sa paghimo sa ilang kinabuhi ingon nga mosalamin sa kasingkasing sa Magbalantay nga si Jesu Kristo!

Ginoo magpadala ka unta og mga balaang apostoles sa imong simbahan! Mga magbalantay nga maantigong maminaw ug mahigugma sa imong mga panon.