Nagdamgo ka og Hugaw sa Tawo

Dunay tawo nga niduol kanako tingali kaha kay nagtuo siya nga ako si Madam Auring ug nangutana: Unsa kahay ipasabot sa akong damgo?”

Ako siyang gipangutana: “Unsa man diay ang imong damgo?

Siya miasoy: “Natulog ko usa ka gabii niana sa dihang wala ko kalihok ug nakita ko ang usa ka anino nga naglingkod ug nag-atubang kanako.

Dako ang maong anino. Sa dihang mikalit siya kanako ug iya kong gituok! Nag-ampo ko apan daw sa way nahitabo.

Ug ang maong damgo nitapos diha sa akong nakita nga nagtunob kuno og hugaw sa tawo!” Wala dayon ko makatingog apan aron siya mahimutang akong gisuwayan og hubad ang maong damgo. Akong gihatagan og igong pagtagad ang hugaw sa tawo.

Nagpasabot kini og emotional blockage nga tungod niini nahimo kang amang sa pagpadayag niini.

Sa laing bahin, nagpadayag kini nga nakasinati ka og rejection gikan sa mga tawo nga nagpalibot nimo. Ang maong mga tawo maoy nakapahimo nimo nga maglagot sa imong kaugalingon ug kanila nga nihimo kanimo nga biktima sa ilang pag-bully.

Sa laing bahin nagpasabot kini nga angayan nimong ipadayag ang imong gibati ug dili nimo kini angayang tipigan sanglit makadaut kini sa imong kaugalingong emosyonal nga kahimtang.

Ang anino nga naglingkod ang nirepresentar sa iyang kaugalingon nga puno sa ambisyon ug tinguha nga makuha ang gusto sa kinabuhi.

Buot niyang magpabiling dynamic ug buot mokab-ot sa bisan unsa nga iyang giisip nga mahinungdanon.

Apan sa laing bahin, ako siyang giingnan nga dili maayo nga magpadaug sa pressure sa kinabuhi. Ang kinabuhi dili lang mahitungod sa kwarta ug sa bisan unsang gahum kondili mahitungod sa gugma nga makatabang sa uban ug kanimo ning kalibutan diin ang tanan ulosahon ug kitang tanan nga mangita sa maong kalambigitan nga nakapahimo natong usa.