Kagahapong adlawa gibisita nako ang mga bukirang barangay sa Dakbayan sa Sugbo.
Sa matag dapit nga akong naagian dayag kaayo ang kabangis nga gipabatyag sa huwaw.
Pila ka mga sapa ang akong gihapitan ug ang tanan wala na gyuy tubig, mga bato nalang ang makit-an.
Gani sa Barangay Budlaan diin nahimutang ang ilang gipasigarbo nga waterfalls naapektohan usab.
Lima ka mga busay ang nakadani sa mga tawo nga motuyo gyud og tungas sa barangay aron masud-ong ang makabibihag nga katahom sa mga falls didto.
Usa ang Kabang Falls nga maoy gihimong pabugnawan sa mga giinitan sa panahon ning naglagiting nga kainit.
Apan naminghoy ang tanan sanglit gamay naman lang kaayo ang tubig sa naasoyng gasa sa kinaiyahan.
Ang nagbasa sa katam-is nga mabatyagan sa lawas sa mga tawong gibati og kanit, nawagtang na.
Bugtong nagpabilin ang kainit sa panahon nga naghatag karon og kalbaryo sa mga tawo.
Dili tiaw akong giagian padung sa waterfalls nga gamay’ng sipyat lang kamatayon ang padulngan tungod ka bakilid sa agianan nga kun masipyat ang tiil didto na sa kinaubsan puniton.
Wala nay masangitan sa lawas tungod kay ang mga gagmayng kahoy ug sagbot nangalaya naman tungod sa El Niño. Gani naa koy mga kadungan nga ubang local tourist ang wala na kasugakod pag adto sa ubos kay delikado kaayo.
Nakaabot man tuod ko sa waterfalls apan muna muna sa ginhawa sa kakulba ug gisamotan dihang mibalik na pagsaka.
Bitaw dako og epekto dili lang sa mga mag-uuma sa bukid kondili apil na sa mga tour guide sa dapit kay wala namay mga turista nga moadto sanglit nawagtang naman ang gasa sa kinaiyahan.
Walay laing mahimo ang mga tawo sa paghulat kanus-a mohilak ang langit kansang mga luha ang tambal sa naughan nga kinaiyahan.