EDITORYAL - Misencounter?

Lisud kaayong sabton ang eksplinasyon  sa kapolisan mahitungod sa giingong ‘misencounter’ tali sa mga sakop sa Cebu City Police Office ug Cebu Provincial Police Office diha sa Barangay Sudlon 1 sa Dakbayan sa Sugbo.

Ang unang nanggawas nga report, target gyud sa mga sakop sa Drug Enforcement Unit sa provincial police ang sakop sa CCPO Mobile Force Company nga si Police Corporal Feliciano Yballe Jr. may labot sa kamatayon ni Police Master Sergeant Junard Cinco nga gi-ambush niadtong adlaw nga Martes didto sa Dakbayan sa Toledo.

Apan paglabay sa pipila ka oras human nga nabaniog na sa social media ang balita ug daghan nang mga tawo ang nitingog bahin sa hitabo, gihimakak ni Police Regional Office-7 Director Debold Sinas ang taho.

Matud niya, misencounter ang tinud-anay nga nahitabo. Unsaon kaha niya pagpasabot ang mga tawo ilabi na ang mga kabanay ug silingan ni Yballe nga nakaobserbar sa pamaagi sa operasyon sa mga sakop sa CPPO-DEU pag-adto sa balay sa napatay nga polis nga si Yballe.

Base sa nigawas nga mga report, “gilibotan” og dili momenus 20 ka armadong tawo diin ang uban nakaunipormeng polis ang balay ni Yballe ug pagkataud-taod nahitabo dayon ang giingong misencounter.

Unsa kahay rason sa pag-adto sa mga polis sa balay ni Yballe ug nganong ingon man niadto  nga paagi sa ilang pakigkita kaniya nga maoy gituohang hinungdan nga nagkaengkwentro na hinuon.

Maayong adunay lig-on nga eksplinasyon ang kapolisan bahin sa nahitabo tungod kay polis sa katawhan ang napatay ug polis sa katawhan ang nakapatay.

Dili panag-iya lamang sa pipila ka lugas nga opisyal sa kapolisan ang kinabuhi sa maong mga polis.

Kun misencounter, unya napatay man si Yballe ug diha gyud mismo sa balay niini, sa ato pa mangapriso gyud ang mga polis nga niadto sa iyang balay?