Katalagman ug teknolohiya

Paspas ang teknolohiya ug dako ang atong pagtuo nga ang teknolohiya makatabang dako uyamot natong mga tawo diha sa paghimo sa atong gusto apan sa laing bahin angay natong hunahunaon nga usahay kun unsa kapaspas ang teknolohiya usahay mamahimong hinay usab ang atong  panghunahuna kini tungod kay nahikawan kita sa paggamit nuon sa atong sentido komon labina sa mga higayon sa katalagman.

 Hinuon personal lang kining obserbasyon.  Pananglitan sa sunog imbis mangita og baldi aron kasudlan og tubig unahon man dayon ang cellphone aron maka upload sa pictures.

 Mao nga imbes masulbad ang problema mosamot naman nuon ang tanan. Makapaulbo sa kalagot sa masig-kahabig ug sa mga hingtungdan. Ingon ini ang kinabuhi karon puno na sa insensitivities ang matag tawo.

Hain ug asa kutob ang hashtag keep safe everyone kun ikaw kutob lang sa pag-post apan wala kay gibuhat nga mas konkreto pa kay sa bisan unsang anaa sa imong hunahuna? Mao gyud tingali ning hunahunaa nga dili gyud ko ganahan og mga tawong naglabi lang ang estorya apan walay buhat ni naglabi lang ang pasiatab apan wala makita sa ilang kinabuhi.

 Ako mismo mas ganahan nga magpakahilom na lang apan padayon nga molihok. Ang matag tawo nahimong daw sa niudhak.

Daghan nato ang nahimong nagtuo nga anaa nato ang bentaha kay nahuptan nato ang teknolohiya sa atong kinabuhi apan nahikalimot kita nga ang bisan unsang virtual dili gyud makahulip sa bisan unsang actual.

Mao ni rason kun nganong hangtud karon kontento ra ko sa pag-ukab sa mga libro ug sa paggamit sa akong papel nga breviario dili tungod kay allergic ko sa maong mga kahimanan apan tungod kay mas gusto nako ang personal touch sa tanan nga akong pagahimoon.

Mao nga diha sa atong kinabuhi dili maayo nga kita mamahimong dependent kaayo sa teknolohiya ug sa atong gadgets  nga moresulta sa naghinobrang addiction natong tanan. Gamita ang teknolohiya aron mas sayon alang nimo ang tanan apan hikalimti ayaw nga sila kahimanan lamang ug dili dios nga angay nga ludhan.