Pagluthang ni Franz

Wala gayud mikonpirma ang kapolisan dinhi sa Sugbo mahitungod sa pagluthang patay kay Franz Sabalones, ang giingong usa sa mga drug lord dinhi sa probinsiya, didto sa kaulohan kaniadtong Huwebes Santo.

Si Cebu Provincial Police Office director Colonel Manuel Abrugena wala mikonpirma nga kadtong napatay didto sa bilyaran sa Quezon City mao gayud si Sabalones. Matud niya nga wala kuno sa ilang hurisdiksiyon ang panghitabo mao nang dili siya makakonpirma.

Hinuon, nagtiner kuno si Sabalones og peke nga mga identification card. Adunay usa nga nakuha ang mga inbestigador gikan sa patay’ng lawas niini. Bisan pa niini, giila siya sa iyang ig-agaw nga mao gayud ang Sugboanon nga drug lord.

Ambot kon kinsay responsable sa pagpatay kang Sabalones. Sa pagkakaron, wala pay gitumbok ang mga inbestigador mahitungod sa mamumuno. Hinuon, alang sa uban, duha lamang ang makahimo niini.

Una niini mao mismo ang otoridad. Kahibalo kita nga daan nang giiming-imingan si Sabalones sa otoridad tungod kay padayon kuno gihapon siya sa iyang negosyo sa druga human sa iyang paggawas sa police detention.

Ikaduha mismo ang iyang mga kauban sulod sa sindikato. Dili ba mao man kini ang naandang rason sa otoridad kun adunay luthangon nga dakong drug personality? Nga naggikan ang pagpatay sa gubot sulod sa organisasyon.

Hinuon base sa nanglabay nga mga insidente, wala gyuy ni usa ka polis ang moangkon nga maoy responsable kun adunay drug suspek nga natumba. Kini gawas lamang kun atol sa anti-drug operation kini nahitabo.

Ato lamang paaboton ang resulta sa inbestigasyon sa otoridad. Hinuon alang kanako, ang resulta sa ilang pakisusi mao nga si Sabalones giluthang gayud sa iyang mga kauban sulod sa ilang grupo. Dili na ikatingala kun mao kana ang ianunsiyo sa otoridad.

Apan lisod nga unhan ang inbestigasyon sa otoridad. Mas maayo nang gikan gayud sa ilang baba ang pag-anunsiyo sa resulta. Hinuon daghan usab ang nanghinaut nga unta dili mamantsahan og dako nga kontrobersiya ang ilang inbestigasyon.