Dakong binuang

Salawayon kaayo ang gihimo niadtong mga tawo nga nanglangkat sa mga campaign posters sa mga kandidato nga alyado sa BOPK didto sa bukid.

Base sa balaod, walay gitugotan sa pagpanangtang sa mga propaganda materials sa mga kandidato, gawas lang kon may pagtugot sa Comelec.

Sa CCTV footage nga nakuha ni Mayor Tomas Osmeña, mga 10 ka tawo nga nagsakay’g mga motorsiklo ang abtik kaayong nanangtang sa ilang mga campaign posters.

Dili ko moingon nga mga sinugo sila ni Vice Mayor Edgardo Labella, nga kaatbang karon ni Osmeña sa pagpapili pagka mayor, apan klaro kaayo nga sila dumadapig sa kontra sa mayor.

Makatuo sab ko nga mora’g  walay kahadlok sa mga polis ang maong mga tawo kay yano-yano ra sila nga mihimo sa ilegal nila nga kalihokan.

Siyaro kon ang mga polis nga nagbase sa kabukiran dili makabantay niining maong mga tawo nga magbahisbahis, ilabi na sa lawom na nga gabii ug kaadlawon, kon ila lang gyud nga gusto.

Apan unsaon, kontra man si Mayor Osmeña ug si Cebu City police chief Royina Garma mao nga dili kita makapaabot nga ang hepe maninguha aron makapabor ang iyang kontra.

* *  *

Init na gyud ang panag-away nila ni Osmeña ug Labella, kinsa pareho nga nangangkon nga kusug kaayo sila sa mga botante.

Sa social media, mabasa nimo nga magtinubagay na sila si Osmeña ug Labella. Kanunay nga tawgon ni Osmeña si Labella nga bakakon ug nagtuo ang mayor nga ang iyang kaatbang may kalabotan sa pagpanghasi sa mga botante sa bukid.

Apan si Labella sab kusganong nanghimakak kay dili kuno iyang kinaiya nga manghasi og mga botante, kay matud niya andam siyang magpapilde basta tinarong lang nga eleksiyon.

Mas maayo pa ang mga kandidato pagka bise mayor kay sila si kanhi mayor Mike Rama ug Konsehal Maryann delos Santos mi-concentrate ra gyud sa ilang pagpangampanya.

Apan mora’g nakasabot ko nga si Konsehal Delos Santos may kahiubos kang Labella ug tingali, kon nagkita sila pag-usab, may isulti siya sa bise mayor.

Dunay daghang nangutana kanako kon kinsa kuno ang dumadaog kanila ni Rama ug Delos Santos. Ang akong ikasulti mao nga dili lang gyud angay’ng mokumpiyansa si Rama kay lig-on na sab ang iyang kontra.

Apan nidayeg ko nga wala sila’y pagdinaotay si Rama ug Delos Santos. May mga propagandist hinoon ni Rama nga moingon nga si Delos Santos kuno nakakuwarta sa halin sa mga kabilya sa karaang CCMC nga giguba niadtong 2014.

Bisan og dili kaayo mi suod si Delos Santos pero dili sab ko motoo sa maong pasangil. Ang tinuod, wa may bayad kadtong pagguba sa karaang CCMC building unya ang sabot mao nga ang mga kabilya ug ubang scrap nga puthaw, mahipunta sa nagguba kay wala man sila bayari.

Aw si Rama nga kaatbang ni Delos Santos nga maoy mayor dihang giguba ang karaang CCMC makahatag niini og katin-awan sa isyu, apan mao lagi, kay kontra man sila sa politika, aw naghilomhilom lang sab.