EDITORYAL - Time out una mga politiko

Semana Santa karon. Sugod karong adlawa magdasok na sab ang mga terminals sa mga pasaherong gustong makauli sa ilang tagsatagsa ka mga probinsya aron mobakasyon, yawat nalang nga makabawi ang lawas ug hunahuna gikan sa kadasok sa trabaho.

Mao usab unta ang mga politiko. Angay sab silang mo-time out lang una sa ilang pamolitika. Mohunong lang una sila sa pagsige og pangdaot sa ilang mga kontra sa politika ug mamalandong sa ilang kaugalingon.

Ang Simbahan nagkanayon nga panahon karon sa katawhan nga mamalandong sa kaugalingon, palig-unon ang relasyon sa tagsatagsa kanato ngadto sa Magbubuhat.

Namatikdan nga karon, bisan sa mga social media sites nagpasad gihapon ang daghang mga posts sa mga politiko. Pagpahumot sa ilang kaugalingon ug pagpangdaot sa ilang mga kaatbang. Samtang tuod dili silang tanan dunay direktang kontrol aning mga social media sites kay posibleng may binayran silang mga “techie people” aron mo-monitor ug mo-post sa ilang mga propaganda, apan sila maoy produktong makita sa katawhan o sa mga netizens. Maayo lang unta kun ang ilang mensahe o propaganda makapaalim sa kasingkasing sa mga makasasala, apan unsaon man kun pagpangatake lang gihapon sa ilang kontra ang ilang mga posts?

Makapasamot kini sa pagpakasala sa mga netizens nga basin anang mga orasa aksidente lang nakabasa sa maong mga posts. Unya makapainit sa ilang ulo ang posts ug magtukmod sab kanila aron makapamalikas o makapanaway. Duna may mga netizens nga daan ng bias o duna nay gilabanang kandidato. Klaro na kini sila nga iya sa maong politikong ilang gilabanan.

 Apan dili unta makalimot ang mga politiko nga kaning ilang mga supporters dili sila ang tag-iya sa kalag.

Kun ang politiko magpakawalay maayong pamatasan pinaagi sa pagpadayon sa ilang salawayong pagpangampanya aron mahalin sa mga botante, dili na unta sila mangamong pa sa ilang supporters nga magpakasala kay panahon karon sa Kwaresma. Magbaton sab unta sila og respeto.