Kun kinsa kaninyo ang walay sala

ABRIL 7, 2019: IKALIMANG DOMINGO SA KWARESMA

mga Pagbasa: Is. 43;16-21/Sal. 126/Fil. 3;8-14/Jn. 8;1-11

Matag usa nato ang buot gyud unta nga magpuyo sa kinabuhing hingpit ug dalaygon. Apan dili ikalimod nga diha sa atong pagkatawhanon nahimo kitang masalaypon. Masalaypon tungod kay dili kita hamtong nga mogamit sa atong gahum sa pagpili.

Ug sa maong imaturity naumol nato ang sala ingon nga resulta sa atong kahuyangan. 

Sa atong paghimo sa ingon nahimong samdan ang atong galamhan. Apan kay lagi ang katilingban nagdapit kanato sa pagpuyo kun unsay madawat sa standard sa moralidad mao nga buot kitang mogawas nga mga hingpit. Sa atong tinguha niini, mahimong atong ma project ngadto sa uban ang atong mga kahuyangan. Gitawag kini og projection.

Atong ipahid ngadto sa uban ang atong mga sayop aron mogawas kita nga limpiyo ug maayo. Mao kini ang nahitabo mga Judio ug mga magtutudlo sa Balaod sa kapanahonan ni Jesus.

Sa dihang nakita nila ang babaye nga hisakpan nga nanapaw ila kining gidala ngadto kang Jesus. Ang silot niini mao man ang kamatayon pinaagi sa pagbato. Ang maong talan-awon ang nakapabutang kang Jesus sa dilemma.  Kun moingon siya nga iyang ipabato ang babaye sanglit mao man kini ang nalatid sa balaod nan, mogawas siya nga way kaluoy.

Kun ugaling moingon siya nga angayang kaloy-on ang maong babaye sama ra nga wala niya tahura ang balaod. Mao nga iya silang giingnan nga kun kinsa kadtong walay mga sala maoy unang mobato sa babaye.

Ang tanan nibiya sugod sa mga tiguwang kay sila nakaamgo man nga sila mismo dunay kasal-anan.  Sa dihang sila nalang duha ang nahabilin walay bisan usa ka paghukom ang gibuhian. Hinunoa gipahimangnoan ang babaye dili na gyud magpakasala.

Personally akong gihimo ang pag imagine nga anaa ko sa maong scenario.

Dili lang gyud tuyoon nga motulo ang akong mga luha dili tungod kay akong nakita ang akong kaugalingon nga nahimong biktima sa kalibutanong bias.  Ang relihiyon nagtudlo nga unta kita mamahimong hingpit ug walay sala. Apan tawo lamang kita ug dili mga anghel.

Sa laing bahin nahimong nakita ko usab ang akong kaugalingon nga nahimong halayo sa kalambigitan ug pagbati tungod ug alang sa mandato sa kalibutang wala pa moabot.

Sa kaulahian ang relihiyon dili sabton nato nga mahitungod lang sa balaod kondili mahitungod sa kalambigitan ug pagsinabtanay.

Christianity is not only a religion but a relationship. Nga usahay nakalimtan sa kadaghanan kay mas gipalabi nato ang bisan unsang material kaysa bisan unsang tawhanon ug relasyonal. Sa kaulahian akong nasabtan ang dakong kahulogan sa awit nga: Amazing Grace! Ug gihimo ko kining pag-ampo sa tanang adlaw sa akong kinabuhi.