Ang ungo sa kinabuhi ni Mam

May magtutudlo kong nakaila, in fairness, gwapa siya. Natingala ko kun nganong sige siya og tutok nako abi nako og nakagusto, diay may ipahubad nga damgo.

Sa iyang damgo siya gigukod og ungo. Ang ungo isog kuno kaayo ug wala siya’y laing nahimo gawas sa paghilak na lang sa tago.

May evil spirit ba kuno nga kaniya nihasol? Kini ang iyang pangutana kanako.

Tuod man kami nagkukabildo sa makadiyot.

Ako siyang gipangutana kun kumusta man ang iyang relasyon sa mga significant others sa iyang kinabuhi. Maayo ra ba sila  dili.

Sa ngadto ngadto siya nisulti nga iyang ginikanan higpit kaayo kaniya.

Mao nga tungod niini maglisud siya pagpadayag sa iyang kaugalingong mga opinyon.

Ang iyang mga ginikanan mao gyud ang magbuot sa iyang kinabuhi.

Wala lang damha nga mitulo ang iyang mga luha. Ako siyang gialam alaman ning mosunod nga mga pahimangno:

1.Pagmatinud-anon sa imong kaugalingon. Dili maayo nga imong isakripisyo ang imong kalipay.

2.Ayaw kahadlok sa pagrisgo diha sa mga butang ug panghitabo nga maisip  natong unknown. Kay diha lamang sa pagrisgo kita mamahimong gawasnon.

3. Buhata ang buot nimong buhaton sa karon aron dili ka magmahay ugma.

Mapasalamaton kaayo siya nga nakadungog niini. Ug samtang gisud-ong ko ang iyang pagsakay sa iyang motorsiklo nilingi siya uban ang pahiyom. Nisinggit siya:

“Mahimo ba nga i-add tika sa FB? Ako siyang gitubag og: “Sure!” seguro ko nga sa umaabot nga mga panahon ako magmatinud-anon sa akong mga pulong.”