Pagpanggukod ni?

May basehanan gyud nga si Mandaue City Mayor Luigi Quisumbing imbestigahon sa posibleng pag-abuso sa katungod sa usa ka PWD nga empleyado.

Gimandoan na si Luigi ni Deputy Ombudsman Paul Elmer Clemente nga tubagon ang kaso nga gipasaka batok kaniya ni Michael Allan Pielago.

Base sa report sa The Freeman, ang 44-anyos nga si Pielago, taga Barangay Umapd, usa ka PWD ug nadestino isip social worker sa City Social Welfare Services Office, apan gibalhin siya sa mayor sa laing departamento.

Matud ni Pielago nga nasakripisyo kaayo siya isip PWD dihang gibalhin ngadto sa Housing and Urban Development Office (HUDO) kay  nagsungkod gud tawon siya, unya maglakawlakaw man siya sa iyang bag-ong katungdanan.

Mora’g nakahinumdom ko nga may susama nga kaso usab nga giatubang ni Luigi diha gihapon sa Ombudsman tungod gihapon sa pagbalhin sa upat ka empleyado sa laing katungdanan kay gituohan nga tua kini misuporta kang Kongresista Jonas Cortes.

Nagkaatbang man gud karon sila si Luigi ug Jonas Cortes sa paglansar pagka mayor sa Mandaue sa eleksiyon karong Mayo 13.

Kon tinuod man ang pagduda sa uban nga pamolitika ang gihimo ni Luigi ngadto ni Pielago, makaingon ta nga grabeha na man pud nga gidaginot niya bisan ang PWD.

Ambot og tuohan ba sa Ombudsman ang pamahayag ni Atty. Elaine Bathan, ang chief of staff ni Luigi, nga kuno ang serbisyo ni Pielago gikinahanglan didto sa HUDO.

* * *

Gitataw gyud ni Assistant Cebu City Engineer Nilo Igot nga propaganda ra ug maisip nga “fake news” ang gipublikar sa social media nga ibaligya ni Mayor Tomas Osmeña ang Cebu City Medical Center.

 Bisan si Konsehal Mary Ann delos Santos nga maoy deputy mayor for health and hospital matters, miingon nga gipadali man gani nila ang kontraktor aron mahuman na ang pagtukod sa hospital building.

Saksi ko nga sila si Engr. Igot ug Konsehal Delos Santos nagtinabangay sa pagsuperbisar sa nagpadayong pagtukod sa bag-ong CCMC.  

Ang P185 milyones nga phase 2 sa pagtukod sa hospital building nagsugod na, ug upat ngadto sa lima ka buwan, magamit na ang ospital.

Nasabtan nako nga kabahin ra sa kampanya sa mga kaatbang nila ni mayor Osmena ang gipasiatab nga ibaligya sa mayor ang CCMC karong panahona.

Wala malilong nga ang mayor nagplano pagbaligya sa karaang CCMC, sa wala pa kini gub-a kaniadtong 2014. Apan ang gipatuo sa mga dumadapig sa kontra sa mayor nga si Osmena mobaligya kuno gihapon sa bag-ong hospital building.

* * *

Si Kapitan Niña Mabatid nga midagan karon pagka konsehal sa dakbayan ubos sa Barug PDP, mitug-an nga nasuko kaniya ang kauban niyang kandidato.

Nasuyaan diay tingali kay si Nina man gud may lain man nga kalihokan sa pagpangampanya nga mao ang paghatag og libreng mga tambal sa mga lumolupyo ug pagpahigayon og pakig-estorya direkta ngadto sa katawhan.