Ang amahan ug duha ka anak

Gahapon ang ebanghelyo naghisgot sa amahan nga nipasaylo ug midawat gihapon sa iyang anak nga mausikon bisan pa man kun ang maguwang anak niini ang nagdumili sa paghimo sa ingon.

Ang anak nga manghod maoy ni representar sa mga kobrador sa buhis niadtong panahona. Ang mga kobrador sa buhis giisip nga mga public sinners sa ilang kapanahonan.

Kini tungod kay una, nialagad sila sa Roman Empire ug ikaduha nahimong kabahin sa ilang balansayon ang korupsiyon. Natural maglagot gyud ang mga lungsoranon.

Sa laing bahin, ang maguwang mahimong morepresentar sa mga Pariseo. Ang mga pariseo giisip nga mga elitistang grupo niadtong panahona.

Hinuon to the letter ang ilang pagsunod sa Balaod ug gani ginaingon pa, mahimong ilang sobrahan mas estriktohon pa ang pagsunod sa balaod kaysa bisan unsang gipangayo niini gikan sa kadaghanan.

Apan lagi ang mahitabo mao  nga sila nahimong mga tawo nga kaugalingon nila ang gihimong standard diha sa ilang paghukom sa uban.

Ang amahan sa laing bahin bisan kun nasayod sa kaboang sa iyang anak ang nipasaylo gihapon niini kaha tingali sa dakong gugma niya ngadto sa iyang anak.

Bisan kun tuod sakit sa iyang buot apan iyang gipalapdan ang iyang kasingkasing alang sa iyang mga anak.

Timailhan sa gugma nga dili matuis. Ning atong panahon karon, nahimong idlas ang tinuod nga pasaylo. Mao nga daghan kaayo nato ang hangtud karon ang wala gihapoy kalinaw.

Ug kun buot nato kining maabot unta maantigo kitang mohatag sa pasaylo dili tungod sa tawo nga kanato nakapsakit kondili tungod sa aotng kaugalingong personal wellbeing.