Matag Biyernes maghimo ang matag simbahan sa dalan sa krus. Dinhi uban ang pamalandong ug pag-ampo ang matag matuohon buot mosubay sa dalan nga giagian sa Ginoo padulong sa Kalbaryo.
Balansayon na kini kaniadto pa. Dili man tanan ang makaadto sa Jerusalem alang sa maong kahigayonan mao nga dinhi na lang kita maghimo niini sanglit dako man ang atong pagtuo nga kabahin kini sa atong panaw sa kinabuhi ang dalan sa krus.
Ang Krus sa matag tawhanon simbolo sa atong kaulipnan ug kauwawan. Gani lisud kaayo ang ilansang sa krus kaniadto dili lang kini mahitungod sa lansang kondili mahitungod usab sa pagpakaulaw nga gihimo nganha kanimo agi og bugti sa imong mga sala.
Apan alang natong mga Kristohanon ang Krus dili kauwawan kondili mahinungdanong kabahin sa atong kinabuhi.
Ang krus simbolo sa atong kaakuhan agig resulta sa atong kinabuhi nga gisubay. Usa kini ka pagsakripisyo apan makaluwas ug makatambal dako uyamot.
Ang krus dunay duha ka mga direksiyon. Ang vertical direction nga nipahinumdom kanato sa atong kalambigitan sa Dios diin nahimo kitang giubanan niya diha sa atong mga pag-antos.
Ang horizontal direction nipahinumdom kanato sa atong kaakuhan sa uban bisan pa man kun duna kitay krus nga gipas-an.
Ang gibug-aton sa krus wala mag-agad sa krus mismo kondili sa atong disposisyon nga gihatag niini. Kun ato kining gidala uban ang pagbagutbot nan, nahimo kining bug-at kaayo.
Apan kun ato kining gidala uban ang gugma ug kalipay, nan mamahimo kining gaan ug makahuloganon diha sa atong kasinatian sa kaputlian sa atong mga intensiyon.