Panagsabot sa kalinaw

Samtang ang bag-ong gimugna nga Bangsamoro Transition Authority (BTA) miarangkada na padulong ngadto sa hingpit nga operasyon niini, si Presidente Rodrigo Duterte nagtinguha og laing kasabotan alang sa kalinaw, niining higayona uban sa kanhi labing dako nga grupo sa mga separatistang Muslim sa nasud.

Sa nakalabay semana, si Duterte nakigkita sa tsirman sa Moro National Liberation Front nga si Nur Misuari sa Malacañang alang sa pagbuhi pag-usab sa panagsabot alang sa kalinaw uban sa MNLF.

Matud sa presidente nga ang lider sa MNLF andam nga mobalik paglingkod sa lamesa sa negosasyon.

Ang MNLF mao ang grupo nga nakigsabot alang sa kalinaw uban sa gobyerno niadtong mga administrasyon ni Aquino ug Ramos.

Malampuson ang maong panaghisgot sa kalinaw bisan pa sa pagsupak sa ubang mga grupo sa mga rebeldeng Moro sama sa Moro Islamic Liberation Front.

Hagbay ra kitang naningkamot alang sa kalinaw sa Mindanao.

Gani ang kalamposan sa negosasyon tali sa kagamhanan ug MNLF maoy naghatag sa dalan alang sa pagmugna sa Autonomous Region sa Muslim Mindanao, kansang unang gobernador mao mismo si Misuari.

Apan subong palandungon nga iyang pagdumala napuno sa mga alegasyon sa kurapsyon hinungdan nga wala gayud milambo ang ARMM, kansang misyon mao ang pagpauswag unta sa kinabuhi sa mga kabus nga nagpuyo sa mga probinsya nga ubos niini.

Usa sa nakadugang sa maong problema mao ang pagdumili usab sa ubang rebeldeng grupo sa pagsuporta sa autonomous nga rehiyon.

Ambot kun unsa ang kamada unya sa pakigpulong alang sa kalinaw tali sa gobyerno ug ni Misuari.

Hinuon naglaum kita nga ang bisan unsang negosasyon uban sa grupo ni Misuari kinahanglan nga mahiuyon gayud sa BTA, ang interim body nga nagdumala sa Bangsamoro Autonomous Region sa Muslim Mindanao (BARMM).

Gipaningkamotan gayud sa gobiyerno nga makab-ot na sa katapusan ang kalinaw sa Mindanao.

Apan ang problema anaa sa mga rebeldeng Moro tungod lagi sa pagdumili nila nga magkahiusa sa mga negosasyon.

Kitang tanan gusto og usa ka malungtaron nga kalinaw alang sa Mindanao aron nga molambo na kini sa katapusan.  Sigun sa atong nakita, ang gobyerno naa sa hustong dalan sa mga paningkamot alang sa kalinaw.

Mao nga kinahanglan nga mohimo usab sa ilang bahin kadtong mga grupo sa mga rebeldeng Muslim kun gusto sila nga molampos gayud ang unsa mang negosasyon.