Lalis sa abang sa luna
Apil sa gilalisan sa 1.4 ka ektarya nga luna sa North Reclamation Area sa Mandaue City, nga maoy nahimutangan sa tulo ka balay patigayon nga gipakandadohan ni Mayor Luigi Quisumbing, maong kagamay ra sa abang: P12 matag metro kuwadrado. Gipakisama ang transaksiyon sa pagbaligya sa 3.5 ka ektarya nga luna sa Barangay Looc sa ubos nga presyo nga P50 matag metro kuwadrado.
Ang duha kabahin sa 10 ka transaksiyon sa pamunoan ni kanhi Mayor, karon Kongresista, Jonas Cortes nga gipasubli ni Quisumbing tungod sa mga pagduda sa kahiwian.
* * *
Gipasabot ni Atty. Jamaal James Calipayan, chief of staff ni Cortes, nga ang abang mas taas sa P12 (apan di siyang kahinumdom sa kantidad) ug gitumong pagdasig sa mga nag-abang sa pagsugod dayon og mga negosyo aron molambo ang mingaw’ng luna.
Apan niingon si Mandaue City Vice Mayor Carlo Fortuna nga mingaw ang luna niadtong 2007 sa pag-umol sa orihinal nga kontrata sa Katumanan Hardware Inc. (KHI) ug ni anhing Mayor Teddy Ouano apan malambuon nang luna niadtong 2012 dihang giusab ni Cortes ang kontrata ug busa angay untang gipausbawan nang abang.
* * *
Laing gilalisan mao ang pasangil nilang Quisumbing ug Fortuna nga gilaktawan ni Cortes ang Mandaue City Council sa pagtugot sa pagbanos sa Cenore Corp. sa pag-abang sa luna.
Pagmatuod sa dakong alkanse sa Mandaue, gitumbok nilang Quisumbing ug Fortuna ang P25 milyones nga gibayad sa Cenore ngadto sa KHI.
Samtang nakadawat ang KHI og P25 milyones sa usa lang ka pamilok, nagkinahanglan ang mga Mandauehanon og 148 ka tuig una makakuha sa samang kantidad.
Apan si Calipayan niinsistir nga mas dako ang mga benepisyo sa paglambo sa luna.
* * *
Matud ni Calipayan ang kontrata sa Mandaue ug KHI nagtugot og sublease busa wa kinahanglanang pagdason sa City Council kay igo nang pirma ni Cortes sa kauyonan sa KHI ug Cenore niadtong 2013.
Apan nipatin-aw si Fortuna di sublease ang nahitabo kon dili deed of assignment, o pagbalhin sa katungod sa KHI ngadto sa Cenore, busa gikinahanglan ang bag-ong kontrata.
Samtang niinsistir si Cortes nga mahimong laktawan ang mga konsahel, gibutyag ni Fortuna nga nangayo ang Cenore sa niaging semana sa pagtugot sa City Council.
* * *
- Latest
