Hangin ang gikinahanglan, dili video

Dinhay higayon nga human ko paimna sa attending nurse og Biogesic tablet, nahibulong ko nganong mikalit paghuot akong dughan ug daw maglisod sa pagginhawa. Sa pagduda nga basig padulong na kadto nga atakehon ko sa sakit sa kasingkasing, mipugos ko sa pag-ubo’g maayo, dayon suyop og hangin, unya ubo na sab taman sa ginhawa. 

Unya, dihang sa akong paminaw, nagpuot lang gihapon akong dughan, misiyagit ko: “Oxygen! Oxygen!” Haskang dalia nakataud sa nurse og oxygen. Aw, naluwas ko.

Aduna pay laing yugto sa akong kinabuhi, diin gipa-fine needle biopsy ko sa akong doktor. Gituslok og dakong dagom akong dughan, tidlom paingon sa baga aron pagkuhag gamayng unod or tissue sample for further study and examination.  Pagkatapos sa maong procedure, gipapahulay ko didto ra sa samang lawak sa ospital.

Dangtag sayis minutos sa akong pagpahulay, kalit lang miawop akong panan-aw. Ang mga suga sa itaas nagkaanam kahanap ang kahayag. Akong nabatyagan nga ingon sa lugsanay na kong makaginhawa.

Dihadiha, misinggit ko: “Oxygen! Oxygen!” Pastilan, morag kilat ang lihok sa nurse nga nakataod sa oxygen nga akong gikinahanglan, uy!

Dayon, gitsek akong heartbeat. 50 na lang, puwerting ubosa. Kay ang normal 94 man pataas.

Mao kini nakabentaha kon sa pribadong ospital i-admit ang pasyente. Kay ingat gyod ang mga nurses ug pirmeng nakatutok sa pasyente aron mahatag gilayon ang tambal o procedure nga gikinahanglan.

Dili sama niadtong nahitabo sa pampublikong tambalanan,Tuburan District Hospital, diin ang pasyente, kinsa morag manok nga gisamaran ang liog ug tilaokan, pero nanglimbasog gihapon aron mabuhi sulod sa tambalanan, igo lang gisigehag ingon sa mga nars nga: “Ay’g bangon, Sir!”

Unya, sa hilom gikuhaan diayg video sa laing nurse-on-duty ang pagkisikisi sa pasyente nga klaro kaayong naglisod na sa pagginhawa. Ang pait, kay gi-upload pa gyod sa internet ug daghan hinuon ang nakasaway sa dili makiangayon nilang gibuhat. Kay ang gikinahanglan sa maong pasyente, hangin (oxygen). Ug dili, video. Pagluwas sa kinabuhi ang ilang giatubang. Ug dili, paggamag pelikula!o

Hinuon, gisuspenso na ang tulo ka nars nga nakahimo sa maong kalapasan. Hinaut unta nga mahimo kining bulawanong leksiyon sa mga tigpabaya, aron dili na mahitabo pag-usab in the future.