Gipaabot nga maka-operate na ang sanitary landfill Carmen sa amihang Sugbo karong tuiga. Mao ni ang proyekto nga dugay nang gihandom ni Gobernador Junjun Davide nga makatabang og tubag sa dako ug dinaliang panginahanglan sa paghipos sa nagbuntaog nga basura sa mga dakbayan ug kalungsoran sa Metro Cebu.
Gipahibawo ni Regional Director William Cunado sa Environmental Management Bureau (EMB) sa Department of Environment and Natural Resources (DENR) sa Central Visayas atol sa Arangkada sa DYAB Abante Pa, Bisaya! nga mahimong aprobahan sa iyang buhatan ang environment compliance certificate (ECC) sa proyekto karong buwana.
* * *
Nakugang ko ning maong kasayuran kay kataposang higayon nga nabalita ang proyekto mao man ang pagprotesta sa pipila ka molupyo sa Barangay Dawis Sur nga maoy pahimutangan sa proyekto.
Nabalaka sila nga mahugaw ang labing dakong tinubdan nila sa tubig, ang suba sa Luyang nga maoy gikuhaan og hangtod 35 milyones ka litro nga tubig matag adlaw.
Apan akong nahibaw-an gikan sa Munisipyo sa Carmen nga gidasonan sa Sangguniang Bayan ang proyekto.
Human sab uyoni sa mga opisyal ug mayoriya sa mga molupyo sa Dawis Sur atol sa public hearing.
* * *
Gihangop ni Cebu Provincial Disaster Risk Reduction and Management Officer Baltazar Tribunalo ang pagtugot sa EMB sa sanitary landfill.
Nipasabot siya nga ang nag-ung-ong nga dakong katalagman ang mga basura sa Sugbo kun wa gyuy tarung nga tipiganan.
Sa iyang bahin, si Cebu Provincial Environment and Natural Resources Officer Rodel Bontuyan nipahibawo nga ang mopatuman sa proyekto usa sa upat ka pribadong kompaniya nga nitanyag sa ilang katakos sa paghakot ug pagtipig sa mga basura.
* * *
Ang labing dako og kahigayonan sa upat mao ang kompaniyang Basic Environmental Systems and Technologies Inc. (BEST).
Kay maoy labing lapad og kasinatian sa pagtukod ug pagduma og landfills, paghakot ug pagtipig og mga basura, pagmugna og refuse-derived fuel (RDF) ug pagduma og materials recovery facilities (MRFs).
Ang BEST maoy labing dakong kompaniya sa basura sa tibuok Pilipinas. Silay nanghipos sa mga basura sa mga dakbayan ug kalungsoran sa Metro Manila.
Silay nagtukod sa sanitary landfill sa Tacloban City sa Leyte. Mao ni labing una nilang proyekto sa Sugbo.
* * *