Duha ka dagway sa ginikanan

Ginaingon nga kon unsa ang punoan, mao usab ang bunga. Kon ang punoan himsog, bus-ok usab ang bunga.

Apan kon ang punoan daot, mamunga pod kinig piyasot.

Sama sa mga ginikanan, kinsa maoy nagmatuto sa ilang anak gikan sa pagtisok niini ngadto sa sabakan sa inahan hangtod sa adlaw nga mobulag na kini sa ilang poder aron motipon sa linalang nga gipili aron magtambayayong sa pagtukod og kaugalingon nilang salag sa kinabuhi.

May ginikanan nga higpit mopatuman sa balaod sa ilang panimalay ngadto sa mga anak. Sama sa akong higala nga pamilya sa mga Caballes.

Si Zaldy, ang amahan sa tulo ka anak, mitudlo sa mga bata nga kinahanglang magkat-on gyod silang tanan sa mga buluhaton sa balay sanglit wala man silay katabang.

Gikan sa paghipos sa gihigdaan inig ka buntag ngadto na sa pagpanghugas sa mga plato, kining maong mga buluhaton, ilang giapod-apod pag-asayin ngadto sa nagtubo pa nilang mga liwat.

Ug kay maoy nakita sa mga bata nga gihimo kanunay sa ilang mama ug papa, ila pong gisunod.

Usab, God-loving ang magtiayong Caballes. Ikuyog gyod nilag simba ang mga anak matag Dominggo agig pasalamat sa grasya nga ilang nadawat.

Nindot ang napuntariyahan sa ilang mga anak dihang nangadagko na.

Ang kinamagulangang babaye, nurse, atua na sa gawas magtrabaho ug dakog suweldo. Ang lalaking nagsunod, kinsa usa ka IT expert, nahimo pong kinatas-ang opisyal  sa usa ka giant international call center kang kansang basic pay hasta kapila pilopiloa ang gidak-on sa suweldo sa amahan.

Pagkadalaygon sa gisangpotan!

May nailhan pod kong adunahang magtiayon didto sa among lungsod kanhi. Sobra ka bongga ang pagdala sa ilang mga anak. Kutob sa unsay pangayoon, gihatag!

Bisan gamay, mga anak wala gyod patilawag kapait. Pirme nilang gibuhong sa kaharuhay. Resulta, pagkamatay nilang magtiayon, naghikog ang usa sa mga lalaki nilang minahal, kinsa hagbay rang nagumon sa gidiling drugas.

Kuno, naguol kay wala nay mommy ug daddy nga mohatag para ipalit og shabu. Paita, sa?

Kining maong panghitabo naglarawan sa duruha ka dagway kon giunsa sa mga ginikanan paggiya ang ilang mga anak ug unsay gisangpotan sa ilang pag-agak. Hain kaha sa duha ang maayong sundon?