EDITORYAL - Climate change angay unahon

Nagkagrabe ang mga katalagmang nasinati sa nagkadaiyang mga kanasuran sa kalibotan, baha, super typhoons, linog, huwaw,pagkasunog sa mga kalasangan, pagkamatay sa mga kahayopan ug mga isda sa kadagatan ug uban pa.

Gitawag kini nga epekto sa climate change o ang pagusab na sa sistema sa klima dili lang sa Pilipinas kondili sa tibuok kalibotan.

Ang polusyon, walay puas nga pagmina, pagkuha sa mga natural resources ug uban pa nga maoy gipadagan sa mga panginahanglan sa tawo maoy gitumbok nga rason sa mga eksperto kun nganong nahitabo kini.

Ang makapaalarma mao nga bisan pa man sa paningkamot sa pipila ka mga nasud nga mapugngan ang climate change, apan wala kini epekto ang ilang gipanghimo. Kini tungod kay mas daghang mga nasud ang wala magpakabana itandi sa mga nasud nga seryusong mikonsiderar sa epekto niini kanila.

Atol sa World Economic Forum nga gihimo niadtong nakalabay nga semana sa Davos, Switzerland si UN Secretary General Antonio Guterres mipahibalo nga paspas kaayo ang kausaban sa klima.

Matud niya kun sa lumba pa, nabiyaan na ang mga tawo ug ang mga kanasuran sa climate change. Ang tubig sa dagat nagkaanam og kataas ang lebel tungod sa padayong pagkahilis sa mga bukid nga niyebe didto sa North ug South Poles.

Nagkaanam usab og kainit ang halos tanang bahin sa kalibotan hinungdan nga adunay mga nahitabong pagkamatay sa mga coral reefs uban ang tanang mga isda nga namuyo niini.

Dili kini maayong tilimad-on para sa mosunod nga mga henerasyon sa tawo. Magunsa ra man kaadunahan kining mga dagkong mga nasud kun ang ekonomiya niini kaunon lang sa danyos sa mga katalagman?

Angay kining seryusohon ug lingkoran sa mga lider sa kalibotan pinaagi sa pagpanday ug pagpatuman gyud sa mga lagda sa pagatiman sa kalikopan tungod kay matag adlaw nagkaanam og kataas ang temperatura ug wala na unyay mahibiling buhi ibabaw ning kalibotana.